नेपाली कम्युनिस्ट पार्टी (नेकपा)का संयोजक पुष्पकमल दाहाल 'प्रचण्ड'ले आफू प्रधानमन्त्री हुँदा गरेका कामहरू गलत थिए भनेर कुनै पनि मन्त्रीले भन्न नसक्ने दाबी गरेका छन्।
नेपाली कांग्रेसको १५ औं महाधिवेशनको उद्घाटन समारोहलाई सम्बोधन गर्दै उनले आफू प्रधानमन्त्री रहँदा रवि लामिछानेले गृह मन्त्री र दोस्रो पटक प्रधानमन्त्री हुँदा गगन थापा स्वास्थ्य मन्त्री रहेको बताउँदै कसैले पनि त्यतिबेला नराम्रो गरेको भन्न नसक्ने बताए।
'रवि लामिछाने मेरो क्याबिनेटको गृहमन्त्री। गगन थापाजी दोस्रो पटक प्रधानमन्त्री हुँदा मेरो क्याबिनेटको स्वास्थ्य मन्त्री। अरू थुप्रै मेरा मन्त्रीहरू हुनुहुन्छ।मलाई लाग्छ, गगनजीले वा यहाँ हुने मेरो क्याबिनेटका कुनै पनि मन्त्रीले मैले गलत गर्यो कसैले भन्न सक्नुहुन्न,' उनले भने।
संयोजक प्रचण्डले त्यतिबेलै गगन थापाको सक्रियताबाट आफू प्रभावित भएको पनि बताए।
'गगन थापाको सक्रियता, गतिशीलता र क्षमता देखेर क्याबिनेटमा मैले उहाँलाई भन्ने गर्थेँ- राम्रो योजना ल्याउनुस्। स्वतन्त्रता पूर्वक तपाईंले ल्याएको योजनालाई शतप्रतिशत समर्थन हुन्छ भन्ने गरेको थिएँ,' उनले भने।
गगन थापालाई त्यतिबेला पनि कुनै समय देशको नेतृत्व गर्नुपर्ने अवस्था आउन सक्ने भनेको प्रचण्डले बताए।
'तपाईंले अन्ततः यो देशको नेतृत्व गर्नुपर्ने अवस्था अन्ततः आज आएको देख्छु,' उनले भने।
उनले सबै नेपाली कांग्रेसका नेता कार्यकर्तालाई केन्द्रित गरेर एउटा विशाल शक्ति निर्माण गर्न गगन थापालाई शुभकामना दिए। 'अझै पनि शुभकामना दिएर भन्छु बाँकी रहेका साथीहरूलाई पनि समेट्ने तपाईंको प्रयास सफल होस्,' संयोजक प्रचण्डले भने।
-1791115108.png)
