कांग्रेसको १५ औं महाधिवेशनको उद्घाटन समारोहमा बोल्ने वक्ताहरूले महाधिवेशनमा सग्लो कांग्रेस सहभागी नभएको विषयमा धारणा राखे।
केही वक्ताहरूले पार्टीको आन्तरिक विषय भए पनि सभापति गगन थापालाई सुझाव दिएका छन्।
पूर्वप्रधानमन्त्री एवम् नेपाली कम्युनिस्ट पार्टी (नेकपा)का संयोजक पुष्पकमल दाहाल 'प्रचण्ड'ले महाधिवेशनमा छुटेकाहरूलाई पनि साथ लिएर अघि बढ्न सभापति गगन थापालाई सुझाव दिए।
उनले कांग्रेस आफैमा ऐतिहासिक लोकतान्त्रिक पार्टी हुनुको नाताले र अहिले देशको 'विषम्' परिस्थितिका कारण पनि सबै कांग्रेस एक भएर अघि बढ्नुपर्ने बताए।
'सबै नेपाली कांग्रेसका नेता–कार्यकर्ताहरूलाई एकीकृत गरेर, केन्द्रित गरेर एउटा विशाल शक्ति निर्माण होस्,’ प्रचण्डले भने, 'म अझै पनि तपाईंलाई शुभकामना भन्न चाहन्छु— बाँकी रहेका साथीहरूलाई पनि समेट्ने तपाईंको प्रयास सफल होस्।'
प्रचण्डले नयाँ पुस्ताका नाममा बुढापाका र वृद्धलाई अपमान गर्ने प्रवृत्ति देखिन थालेको भन्दै त्यसबाट बच्न पनि कांग्रेस नेतृत्वलाई आग्रह गरे।
‘यहाँ एउटा प्रवृत्ति छ— बुढापाका, वृद्ध भनेपछि तिनीहरूलाई अपमानित गर्ने खालको प्रवृत्ति नयाँ भन्नेहरू एकथरीले देखाएका छन्। हामी लोकतन्त्रवादी, हामी शान्तिका पक्षधर, हामीले त्यो प्रवृत्ति देखाउन हुँदैन,’ उनले भने।
समाज वृद्ध, प्रौढ र युवाहरू मिलेर चल्ने भएकाले सबै पुस्तालाई साथ लिएर अघि बढ्नुपर्ने प्रचण्डको भनाइ थियो।
राष्ट्रिय स्वतन्त्र पार्टी (रास्वपा)का सभापति रवि लामिछानेले भने कचकच गर्नेहरूलाई छाडिदिन गगनलाई सुझाव दिएका छन्।
‘कहिलेकाहीँ पार्टीभित्र बसेर सधैँ कचकच गर्ने, गनगन गर्ने, हैरान गर्ने, फकाउँदा फकाउँदा सम्पूर्ण शक्ति नष्ट गरिदिने साथीहरूलाई फकाउनुभन्दा छोडिदिएकै राम्रो पनि हुन्छ,’ लामिछानेले भने।
उनले आफूले गगनलाई यो सुझाव दिएर दोस्रोपटक गुण लगाएको भन्दै मान्ने वा नमान्ने जिम्मा भने गगनकै भएको बताए।
‘कहिलेकाहीँ यति भनिदिएर मैले गगनजीलाई दोस्रो गुण लगाएको छु। मान्ने नमान्ने तपाईंको जिम्मा,’ उनले भने।
