कृषि अभियन्ता सुजन सापकोटाले नेपाली कांग्रेसको १५औँ महाधिवेशनमा गण्डकी प्रदेश भूगोलतर्फबाट केन्द्रीय सदस्य पदमा उम्मेदवारी घोषणा गरेका छन्।
नेपाल विद्यार्थी संघमा विगत १५ वर्षदेखि सक्रिय सापकोटाले पोखरास्थित पुरञ्चौर कृषि क्याम्पसको सभापति, कृषि तथा वन विज्ञान विश्वविद्यालय समन्वय समितिको नेतृत्व हुँदै नेपाल विद्यार्थी संघको केन्द्रीय सदस्यसम्मको जिम्मेवारी सम्हालिसकेका छन्।
राजनीतिसँगै कृषि क्षेत्रलाई आफ्नो मुख्य कार्यक्षेत्र बनाउँदै आएका सापकोटाले पछिल्ला तीन वर्षदेखि बागलुङमा ‘बाँझो नराखौँ खेतबारी’, ‘Green Baglung Movement’ र ‘Plant Distribution Movement’ लगायतका अभियान सञ्चालन गर्दै आएका छन्।
कृषि उत्पादन वृद्धि, बाँझो जमिनको उपयोग, किसानलाई प्राविधिक सहयोग र वातावरण संरक्षणलाई केन्द्रमा राखेर सञ्चालन गरिएका उनका अभियानमार्फत बागलुङका विभिन्न क्षेत्रमा किसान तथा विद्यार्थीलाई कृषि प्रविधि, बिरुवा र प्राविधिक परामर्श उपलब्ध गराउँदै आएको बताइएको छ।
विद्यार्थी राजनीतिबाट सक्रिय हुँदै कृषि अभियन्ताका रूपमा समेत काम गर्दै आएका सापकोटा महाधिवेशन प्रतिनिधिमा निर्वाचित भएका थिए। उनले अब केन्द्रीय सदस्यको उम्मेदवारी घोषणा गर्दै युवाको नेतृत्वदायी भूमिका, कृषि उद्यमशीलता, रोजगारी सिर्जना र बागलुङको कृषि विकासका विषयलाई प्राथमिकताका साथ उठाउने बताएका छन्।
.JPG)
