नेपाल नगरपालिका संघका अध्यक्ष एवं धादिङको नीलकण्ठ नगरपालिकाका नगर प्रमुख भीमप्रसाद ढुंगानाले नेपाली कांग्रेसको केन्द्रीय सदस्य पदमा उम्मेदवारी घोषणा गरेका छन्।
कांग्रेसको १५औँ महाधिवेशनअन्तर्गत काठमाडौंको भृकुटीमण्डपमा जारी महाधिवेशनमा उनले खुलातर्फ केन्द्रीय सदस्य पदमा उम्मेदवारी दिने भएका हुन्।
२०७४ सालमा पहिलो पटक नीलकण्ठ नगरपालिकाको नगर प्रमुख निर्वाचित भएका ढुंगाना २०७९ मा दोस्रो कार्यकालका लागि पनि निर्वाचित भएका थिए। पहिलो कार्यकालमा नेपाल नगरपालिका संघको महासचिव र दोस्रो कार्यकालमा अध्यक्षको जिम्मेवारी सम्हालेका छन्।
स्थानीय तहको अधिकार, संघीयता, वित्तीय तथा प्रशासनिक संघीयता र स्थानीय सरकारका साझा सवाललाई राष्ट्रिय बहसमा उठाउँदै आएका ढुंगाना विकासप्रेमी र स्पष्ट वक्ताका रूपमा परिचित छन्।
कांग्रेसको नेतृत्वमा नयाँ पुस्ता र स्थानीय तहको अनुभव भएका व्यक्तिको सहभागिता बढाउन आफूले उम्मेदवारी दिएको ढुंगानाले बताएका छन्।
.JPG)
