नेपाली कांग्रेसका उपसभापति विश्वप्रकाश शर्माले १५औँ महाधिवेशनमा विगतमा जस्तो नेताहरू दुईतिर बसेर टिम र प्यानल बनाउने अवस्था नरहेको बताएका छन्।
महाधिवेशनको सन्दर्भमा आफूलाई आएका दुईवटा टेलिफोनको उदाहरण दिँदै शर्माले कांग्रेसभित्र अझै पनि पुरानै प्रवृत्ति देखिएको बताए।
‘दुईवटा टेलिफोन आयो। एउटा साथीले भन्नुभयो– दाइ, महाधिवेशन प्रतिनिधिमा हारेँ, भोट हाल्न आउन पाइनँ। अर्को (देउवा) तिर पनि महाधिवेशन छ, त्यता पाइन्छ कि? अर्को फोन आयो– दाइ, म महाधिवेशन प्रतिनिधि भएँ, अब केन्द्रीय सदस्यमा प्रयास गरौँ कि भन्दैछु,’ उपसभापति शर्माले खुलामञ्चमा भएको बन्दसत्रमा भने।
शर्माले कांग्रेसको महाधिवेशनमा देखिएको यस्तो प्रवृत्तिबारे सचेत हुनुपर्ने बताए। उनले चर्चाअनुसार करिब १५ सय प्रतिनिधिले १० वर्षे क्रियाशील सदस्यताको कागज लिएको उल्लेख गर्दै यसपटक विगतको जस्तो प्यानल निर्माण नहुने बताए।
‘म तपाईंहरूलाई स्मरण गराउन चाहन्छु, चर्चाअनुसार १५ सय साथीहरूले क्रियाशील लिएको १० वर्षे कागज लिनुभएको छ,’ उनले भने, ‘यसपालि ढुक्क हुनुहोला। पहिलाजस्तो दुईतिर नेताहरू बसेर टिम र प्यानल बनाउने अहिले हुँदैन। प्यानल बन्दैन,’ उनले भने।
१५ औं महाधिवेशनअन्तर्गत आज उम्मेदवारी दर्ता भइरहेको छ।
.JPG)
