नेपाली कांग्रेसका वर्तमान महामन्त्री प्रदीप पौडेलले पार्टीको १५औं महाधिवेशनमा महामन्त्री पदमै उम्मेदवारी दर्ता गराएका छन्।
पौडेलले मंगलबार राष्ट्रिय सभागृह पुगेर खुलातर्फ महामन्त्री पदमा मनोनयन दर्ता गराएका हुन्।
कांग्रेसको नयाँ विधान अनुसार तीन जना महामन्त्री निर्वाचित हुनेछन्। त्यसमध्ये दुई जना खुला र एक जना महिला कोटाबाट चयन हुने व्यवस्था छ। पौडेल खुलातर्फ उम्मेदवार बनेका हुन्।
पौडेल गत पुसमा भएको कांग्रेसको दोस्रो विशेष महाधिवेशनबाट महामन्त्रीमा सर्वसम्मत चयन भएका थिए। विशेष महाधिवेशनले उनलाई गुरूराज घिमिरेसँगै महामन्त्री बनाएको थियो।
त्यसभन्दा चार वर्षअघि भएको १४औं महाधिवेशनमा पौडेल महामन्त्री पदमा पराजित भएका थिए।
त्यस बेला शेरबहादुर देउवा पक्षबाट उम्मेदवार बनेका पौडेल १ हजार ४०९ मतसहित चौथो भएका थिए। गगन थापा र विश्वप्रकाश शर्मा महामन्त्री निर्वाचित भएका थिए।
त्यसपछि पौडेल कांग्रेस केन्द्रीय सदस्यका रूपमा सक्रिय रहे। २०७९ को प्रतिनिधिसभा निर्वाचनमा उनी काठमाडौं क्षेत्र नम्बर ५ बाट निर्वाचित भए। निर्वाचन आयोगको तथ्यांक अनुसार उनले १५ हजार २६९ मत पाएका थिए।
पौडेल विद्यार्थी राजनीतिबाट कांग्रेसको मूल नेतृत्वमा आएका हुन्। उनी २०५३ सालमा अमृत साइन्स क्याम्पसको स्वतन्त्र विद्यार्थी युनियनका सभापति भएका थिए।
२०६४ सालमा नेपाल विद्यार्थी संघको केन्द्रीय अध्यक्ष बनेका थिए। २०६२/६३ को जनआन्दोलनमा उनी पक्राउसमेत परेका थिए। प्रतिनिधिसभाको आधिकारिक प्रोफाइल अनुसार उनी २०४८ सालदेखि कांग्रेसमा आबद्ध छन्।
२०७९ मा प्रतिनिधिसभामा निर्वाचित भएपछि पौडेल केपी शर्मा ओली नेतृत्वको सरकारमा स्वास्थ्य तथा जनसंख्या मन्त्री बने। उनले करिब एक वर्ष स्वास्थ्य मन्त्रालय सम्हाले।
आफ्नो कार्यकालमा स्वास्थ्य सेवा, स्वास्थ्य बीमा तथा सार्वजनिक अस्पतालको सेवा सुधार लगायत विषयलाई प्राथमिकतामा राखेको दाबी गरेका थिए।
२०८२ भदौमा भएको जेनजी आन्दोलनपछि उनले मन्त्री पदबाट राजीनामा दिए। आन्दोलनमा भएको दमनप्रति असन्तुष्टि जनाउँदै पदमा बसिरहन नैतिक रूपमा उचित नहुने बताएका थिए।
सरकारबाट बाहिरिएपछि पौडेल कांग्रेसभित्र नेतृत्व परिवर्तन र विशेष महाधिवेशनको पक्षमा सक्रिय भए। उनले विशेष महाधिवेशनलाई पार्टीभित्रको वैधानिक प्रक्रिया अघि बढाउने पहिलो कदमका रूपमा व्याख्या गरेका थिए।
त्यही अभियानबाट विशेष महाधिवेशनसम्म पुगेपछि पौडेल महामन्त्री बने।
अब विशेष महाधिवेशन भएको करिब नौ महिनामै पौडेल फेरि महामन्त्री पदका लागि प्रतिस्पर्धामा ओर्लिएका छन्।
कांग्रेसको १५औं महाधिवेशनमा नयाँ नेतृत्व चयनका लागि ७ हजार १ सय १४ प्रतिनिधिको अन्तिम मतदाता सूची प्रकाशित गरिएको छ।
नयाँ नेतृत्व चयनका लागि असोज २१ र २२ गते निर्वाचन गर्ने कार्यतालिका छ।
.JPG)
