जापान र साउदी अरेबियाका लागि प्रस्तावित राजदूतविरूद्ध संसदीय सुनुवाइ समितिमा उजुरी परेको छ।
संसदीय सुनुवाइ समितिले १३ देशको राजदूत पदका लागि उजुरी आह्वान गरेको थियो। तर प्रस्तावित दुई राजदूत विरूद्ध मात्र समितिमा उजुरी परेको हो।
जापानका लागि प्रस्तावित जिज्ञानकुमार थापा विरूद्ध ३ वटा र साउदी अरेबियाका लागि प्रस्तावित राजदूत गिरीबहादुर सुनार विरूद्ध दुई वटा उजुरी परेको हो।
अर्को एउटा उजुरी भने समग्रमा राजदूत नियुक्तिमा समावेशिता नभएको भन्नेछ। महिलाको प्रतिनिधित्व ५० प्रतिशत र अन्य समुदायको समानुपातिक प्रतिनिधित्व नभएको ती उजुरीकर्ताको आरोप छ।
त्यस्तै अर्को एक उजुरीकर्ताले भने भारतका लागि प्रस्तावित राजदूत निश्चलनाथ पाण्डेको तारिफ गरेका छन्।
ती उजुरीकर्ताले भने 'पाण्डे जस्तो मान्छे सरकारी जागिर खान किन गएको होला?' भन्दै प्रश्न उठाएका छन्। पाण्डे जस्तो मान्छे प्राज्ञ हुनुपर्ने राय उजुरीकर्ता आकृति शर्माको छ।
जापानका लागि प्रस्तावित जिज्ञानकुमार थापा विरूद्ध जापानको स्थायी आवासीय अनुमति रहेको भन्ने उजुरी छ। उजुरीकर्ताले राजदूत पदका लागि जारी गरेको पूर्वयोग्यतामा कुनै विदेशी मुलुकको स्थायी वा अस्थायी आवासीय अनुमति प्राप्त गरेको हुनु नहुने स्पष्ट योग्यता तोकेको उल्लेख गरेका छन्। थापाले सन् २०१८ मा जापानको एक पत्रिकालाई आफूसँग पिआर रहेको र त्यसपछि जापानमा बस्दै आएको बताएका थिए। थापाको कानागवा प्रिफेक्चरमा घर समेत रहेको उल्लेख छ।
'उहाँले स्थायी आवासीय अनुमति प्राप्त गरेको मिति, त्यसको वर्तमान अवस्था तथा उम्मेदवारी/आवेदन पेस गर्दा उक्त विवरण खुलाइएको थियो वा थिएन भन्ने विषयमा आधिकारिक कागजातसहित स्पष्ट छानबिन गरियोस्,' उजुरीकर्ताले माग गरेका छन्। उजुरीकर्ताले थापाले जापान सरकारबाट राजदूतका रूपमा स्वीकार नहुने सम्भावना समेत औँल्याएका छन्।
जापानमा घर रहेको बताएकाले थापाको घरजग्गा, व्यावसायिक संलग्नता, आर्थिक लगानी र बैंकिङ दायित्व भए नभएको पनि परीक्षण गर्न उजुरीकर्ताले माग गरेका छन्।
अर्का एक उजुरीकर्ताले भने जिज्ञान थापाको नागरिकता समेत हेर्नुपर्ने भनेका छन्। साथै उनको परिवार नेपालमा बसोबास गर्छ कि गर्दैन पनि हेर्नुपर्छ भनेका छन्।
सुनुवाइ समितिमा साउदी अरेबियाका लागि प्रस्तावित राजदूत गिरीबहादुर सुनार विरूद्ध भने गम्भीर उजुरी परेको छ।
उनीविरूद्ध महिलामाथि यातना दिएको तथा हिसां गरेको उजुरी परेको हो।
उजुरीकर्ताले प्रेम सम्बन्धमा रहेर छुटेकी महिला र उनको परिवारलाई सुनारले धम्की दिएको भन्दै उजुरी दिएकी हुन्। उजुरीकर्ताले उक्त घटनामा दुई पटकसम्म सुनारले ललितपुर प्रहरी कार्यालयमा माफी मागेको पनि उजुरीम उल्लेख गरेकी छन्। साथै महिलाको परिवारलाई अन्तरंग फोटोहरू समेत पठाएको उजुरीकर्ताको दाबी छ। उजुरीकर्ताले सो घटनासँग सम्बन्धित मेसेजको स्क्रिनसट, प्रहरी कार्यालयमा माफी माग्ने र मिलापत्र हुँदाका प्रतिलिपि समेत बुझाएकी छन्।
त्यस्तै, अर्को एक उजुरीकर्ताले भने रास्वपा सांसद खगेन्द्र सुनारको हाम्रो नेपाल पार्टीमा आबद्ध भएकाले गिरीबहादुर सुनार राजदूत हुन अयोग्य रहेको उल्लेख गरेका छन्।
राजदूत नियुक्त हुने व्यक्ति कुनै दलसँग आबद्ध हुन नहुने उजुरीकर्ताको दाबी छ। उनले खगेन्द्र सुनारले दर्ता गराएको हाम्रो नेपाल पार्टीको केन्द्रीय समितिको सूची समेत बुझाएका छन्।
ती उजुरीकर्ताले राजदूतमा सिफारिस भएका सुनारभन्दा सांसद खगेन्द्र सुनारको बदख्वाँइ ज्यादा गरेका छन्। खगेन्द्र सुनारले विभिन्न व्यक्तिसँग पैसा उठाएको र त्यो पैसा व्यवस्थापनको काम गिरीबहादुरले गरेको आरोप उजुरीमा छ। त्यस्तै प्रहरीमा डिआइजी बढुवामा सांसद सुनार र प्रस्तावित राजदूत सुनारले ३३ लाख पैसा बुझेको आरोप समेत उजुरीकर्ताको छ। त्यस्तै गिरीबहादुरलाई राजदूत सिफारिस गर्न स्वामी आनन्द अरूण समेत मन्त्रालय गएको फोटो उजुरीकर्ताले पठाएका छन।
उजुरीकर्ताले सबैजसो जिल्लाबाट सूचना संकलन गरेको देखिन्छ। ती सूचना खगेन्द्र सुनार विरूद्ध संकलन गरेको भए पनि गिरीबहादुर सुनार विरूद्ध प्रयोग गर्न खोजेको देखिन्छ। उजुरीकर्ताले दलित आन्दोलनका लागि उठाइएको पैसा खगेन्द्र सुनारले दुरूपयोग गरेको र त्यसको व्यवस्थापन गिरी बहादुर सुनारले गरेको आरोप लगाएका छन्।
राजदूतमा सिफारिस भएकाहरू विरूद्ध प्राप्त उजुरी माथि अब समितिले पहिला सोधपुछ गर्नेछ। सोधपुछपछि उजुरीकर्ताको विषयवस्तुमा समेत संसदीय सुनुवाइ समितिले प्रस्तावित राजदूतसँग जबाफ खोज्नेछ। संसदीय सुनुवाइ समितिको बहुमतले प्रस्तावित नाम सिफारिस गर्न सक्छ। अस्वीकार गर्न भने दुई तिहाइ आवश्यक हुन्छ। सत्तारूढ रास्वपा एक्लैको संसदीय सुनुवाइ समितिमा बहुमत छ।
.JPG)
