नेपाली कांग्रेसका नेता तथा प्रतिनिधि सभा सांसद अर्जुननरसिंह केसीले १५औँ महाधिवेशनमा कुनै पनि पदमा उम्मेदवारी दिएनन्।
महाधिवेशनमा सहभागी कांग्रेसका प्रतिनिधिहरूलाई अपिल गर्दै केसीले आफ्नो निर्णय असन्तुष्टि, निराशा वा कुनै अडानका कारण नभएको स्पष्ट पारेका छन्। उनले आफू पूर्ववत् उत्साह र ऊर्जाका साथ पार्टीमा क्रियाशील रहने बताएका छन्।
केसीले १५औँ महाधिवेशनलाई कांग्रेसको भावी दलीय जीवनलाई थप ऊर्जाशील, गतिशील र परिणाममुखी बनाउने ऐतिहासिक अवसरका रूपमा लिनुपर्ने बताएका छन्।
विशेषगरी युवापुस्तामा देखिएको उत्साह र नवीन आशाले महाधिवेशनलाई इतिहासकै गरिमामय अध्याय बनाउने उनको भनाइ छ।
गत पुसमा सम्पन्न विशेष महाधिवेशनले दिएको मार्गदर्शन, सन्देश र मर्मलाई नियमित महाधिवेशनले पूर्णता दिनुपर्नेमा जोड दिँदै केसीले विगतका कमीकमजोरी, आन्तरिक गुटबन्दी, गिरोहवाद र विकृतिको ‘कोर्स करेक्सन’ गर्नुपर्ने बताए।
उनले कांग्रेसलाई संस्थागत, विधिसम्मत, पारदर्शी र नीतिमुखी दिशामा अघि बढाउनुपर्नेमा जोड दिएका छन्। जटिल राष्ट्रिय परिस्थिति र बदलिँदो विश्व परिवेशमा मुलुकलाई सही नेतृत्व र राष्ट्रिय एकताको दिशामा अघि बढाउने जिम्मेवारी कांग्रेसको रहेको उनको भनाइ छ।
पार्टी एकताका लागि आफूले विगतमा पनि इमानदार प्रयास गरेको र आगामी दिनमा पनि निरन्तर गरिरहने केसीले बताएका छन्। उनका अनुसार एकता महाधिवेशनको निश्चित अवधिका लागि मात्र नभई निरन्तर चलिरहने प्रक्रिया भएकाले सबैले उदार, लचिलो र फराकिलो सोच राख्न आवश्यक छ।
केसीले कांग्रेसलाई अस्वस्थ गुटबन्दी, आन्तरिक फूट र भागबण्डाको राजनीतिबाट मुक्त गर्दै वैचारिक पुनर्जागरणसहित ‘नवीन र बदलिएको कांग्रेस’ निर्माण गर्नुपर्ने बताए। विशेष महाधिवेशनको मूल मर्म पनि यही रहेको उल्लेख गर्दै उनले १५औँ महाधिवेशनले त्यसलाई पूर्ण रूपमा सार्थक बनाउने विश्वास व्यक्त गरेका छन्।
नेतृत्व चयनका क्रममा निष्ठावान् कार्यकर्ताको निरन्तर योगदान, जनप्रियता, योग्यता, सांगठनिक प्रतिबद्धता र युवा सहभागितालाई आधार बनाउनुपर्ने केसीको सुझाव छ। सर्वसम्मतिको अधिकतम प्रयास गर्नुपर्ने र त्यो सम्भव नभए स्वस्थ, निष्पक्ष तथा गुटमुक्त लोकतान्त्रिक प्रतिस्पर्धालाई स्वीकार गर्नुपर्ने उनले बताएका छन्।
‘लोकतन्त्रमा मत विभाजन हुन सक्छ तर मन विभाजन हुनु हुँदैन’ भन्दै केसीले महाधिवेशनको प्रतिस्पर्धालाई अवाञ्छित हस्तक्षेप, दबाब वा विचार लाद्ने प्रवृत्तिबाट मुक्त राख्न आग्रह गरेका छन्।
आफ्नो व्यक्तिगत निर्णयबारे उनले भनेका छन्, ‘मेरो अबको सम्पूर्ण ध्यान र प्रयास व्यक्तिगत पदप्राप्तिमा होइन, पार्टीको अभेद्य एकता, संस्थागत सुदृढीकरण र समग्र राष्ट्रिय एकताको प्रयासमा समर्पित हुनेछ।’
प्राविधिक वा सर्तसहितको एकताभन्दा सैद्धान्तिक, वैचारिक र भावनात्मक एकताले मात्रै समृद्ध नेपाल निर्माण र राष्ट्रिय एकताको मार्ग प्रशस्त गर्ने केसीको भनाइ छ।
.JPG)
