प्रधान न्यायाधीशले मनोजकुमार शर्माले मनपरि ढंगले संवैधानिक इजलास गठन गरेको भन्दै न्यायाधीशहरूले विरोध जनाएपछि आज संवैधानिक इजलास नबस्ने भएको छ।
आज प्रधानन्यायाधीश शर्माले आफूसहित, सपना मल्ल प्रधान, हरि फुयाल, नहकुल सुवेदी र अब्दुल अजिज मुसलमानको इजलास तोकेका थिए। सर्वोच्च अदालतका अरू इजलासका लागि गोलाप्रथाद्वारा पेशी तोक्ने व्यवस्था भए पनि संवैधानिक इजलासमा प्रधान न्यायाधीशको उपस्थिति अनिवार्य भएकाले उनले नै पेशी तोक्ने चलन छ।
संवैधानिक इजलास बस्नुअघि संयुक्त च्याम्बरमा भेला भएका बेला न्यायाधीश हरि फुयालले आजसम्मका इजलासमा आफूलाई किन नराखेको र आज राखेको भनेर प्रधान्यायाधीश शर्मासँग प्रश्न गरेका थिए।
'हिजो अस्ति (यसअघिका संवैधानिक इजलासमा) मलाई किन राख्नुभएन, आज किन राख्नुभयो, यसको तर्क होला। त्यसकारण हिजो नराखेको कुरामा मलाई केही भएन। तर अब यसपछाडिको कुरामा चाहिँ छलफल गरौं,' उनले भनेको सर्वोच्च स्रोतले जानकारी दियो।
‘हरि श्रीमानले कि त संवैधानिक इजलास वरिष्ठताको आधारमा तोक्नुपर्यो कि वैकल्पिक नीति जस्तो गोलाप्रथा जस्तो विधि तय गर्नुपर्यो। मनलाग्दी गठन गरेको इजलासमा म बस्दिन भन्नुभयो,’ सर्वोच्च स्रोतले भन्यो, ‘संवैधानिक इजलास एउटा नियममा चल्नुपर्छ। यो व्यक्तिगत कुरा होइन, स्वतन्त्र न्यायपालिकाको विषय हो त्यसैले नियम चाहिन्छ भन्ने उहाँको भनाइ थियो।'
स्रोतका अनुसार संवैधानिक इजलास राज्यको धेरै महत्वपूर्ण संस्था भएकाले यसको गठन अनुमानयोग र निश्चित हुनुपर्ने उनको तर्क थियो।
स्रोतका अनुसार न्यायाधीश फुयालको भनाइमा अरू वरिष्ठ न्यायाधीशले सहमति जनाएका थिए।
न्यायाधीश फुयालले अघि सारेको संवैधानिक इजलास गठनको प्रक्रिया सुनिश्चित गर्ने छलफल अघि बढाए मात्र इजलासमा बस्ने शर्तमा प्रधान न्यायाधीश भने असहमत भए।
‘यो विषयमा कि त प्रधान न्यायाधीशज्यूले ‘म यो छलफलमा लिएर जान्छु, अहिले बसौं’ भन्नुहुन्छ भने आज इजलास बसौं,’ न्यायाधीशहरूले शर्त राखे।
स्रोतका अनुसार प्रधान न्यायाधीशले जवाफ दिए, ‘होइन, यो विषयमा छलफल हुँदैन, म मेरो हिसाबले गठन गर्छु।’
त्यसो भए आफू चाहिँ इजलासमा नबस्ने भन्दै न्यायाधीश फुयाल अडिएपछि प्रधानन्यायाधीश शर्माले कर्मचारीलाई बोलाएर आजको इजलास नबस्ने जनाउ दिन अह्याएको स्रोतले जानकारी दियो।
पूर्वप्रधान न्यायाधीश चोलेन्द्र शमसेर राणाको पालामा सर्वोच्च अदालतको पेशी तोक्ने प्रकृयाबाटै अनियमितता बढेको भन्दै न्यायाधीशहरूले इजलास बहिष्कार गरेको थिए। त्यसपछि उनीहरू गोलाप्रथा लागु गरेर मात्रै इजलास फर्किए। त्यसपछि भने तत्कालीन प्रधानन्यायाधीश राणा इजलासमा फर्किएनन्। त्यतिबेला प्रधान न्यायाधीश संवैधानिक इजलास हुनैपर्ने व्यवस्थाका कारण संवैधानिक इजलासमा भने गोलाप्रथा लागु गरिएको थिएन।
केही समय यता नेपाल बार एशोसिएसनले संवैधानिक इजलासमा पनि गोलाप्रथाबाट पेशी तोक्ने व्यवस्था माग गर्दै आएको छ।
.JPG)
