नेपाली कांग्रेसको १५औं महाधिवेशनअन्तर्गत बिहीबार बिहान १० बजेदेखि अपराह्न ५ बजेसम्म मतदान हुने भएको छ।
मतदानलाई व्यवस्थित र मर्यादित बनाउन निर्वाचनसम्बन्धी आचारसंहिता जारी गर्दै महाधिवेशनस्थलमा चिटलगायत प्रचार सामग्री बाँड्न प्रतिबन्ध लगाइएको छ।
आज बन्द सत्रमा निर्वाचन आचारसंहिताबारे जानकारी गराउँदै उम्मेदवार तथा प्रचारप्रसारमा खटिएका सबैलाई नियम पालना गर्न आग्रह गरिएको हो।
यसैबीच, सभापति गगन थापाले महाधिवेशन प्रतिनिधिहरूलाई कुनै प्रभावमा नपरी विवेक प्रयोग गरेर मतदान गर्न आग्रह गरेका छन्। उनले महाधिवेशन स्थलमा आउँदै गर्दा विभिन्न ठाउँमा 'गगन थापा समूह' लेखिएको चिट बाँडिएको आफूले देखेको बताए।
'आज यहाँ आउँदै गर्दा मैले देखेँ, साथीहरूले मलाई देखाउनुभएको छ, ठाउँ–ठाउँमा गगन थापा समूह भनेर चिट बाँडिराखेको कहीँ–कहीँ देखियो,' थापाले भने, 'विवेक प्रयोग गर्नुहोस्।'
थापाले कांग्रेसमा विगतमा रहेका विभिन्न गुट अब समाप्त भएको दाबी गरे। उनका अनुसार कांग्रेसमा अब औपचारिक रूपमा कुनै गुट छैन।
'कांग्रेसभित्र अब औपचारिक रूपमा गुट छैन। ७४, ३६, देउवा समूह, कोइराला समूह, विशेष, नियमित सबै समूह आजदेखि सकियो,' उनले भने।
१५औं महाधिवेशनबाट गुटको अन्त्य हुनु महत्वपूर्ण उपलब्धि भएको थापाको भनाइ थियो। उनले पार्टीलाई एकताबद्ध बनाउन सबै पक्षका नेता तथा कार्यकर्ताको भूमिका आवश्यक रहेको बताए।
उनले महाधिवेशनपछि कांग्रेसलाई गुटगत आधारमा नभई एउटै पार्टीका रूपमा अघि बढाउने संकेत गरे। पार्टीभित्र लामो समयदेखि रहेका समूह र विभाजनभन्दा कांग्रेसलाई एकताबद्ध बनाएर अघि बढाउनुपर्ने उनको भनाइ छ।
थापाले यसअघि पनि आफूले पार्टीको आन्तरिक व्यवस्थापनमा सीमित हुनेभन्दा कांग्रेसलाई समाज र जनताबीचको बहसमा केन्द्रित गर्ने बताए। उनले आफ्नो समयको ठूलो हिस्सा पार्टीभन्दा बाहिर कांग्रेसका नीति, विचार र मुलुकका विषयमा बहस गर्न खर्चिने बताएका छन्।
सभापति थापाले महाधिवेशन सकिएलगत्तै स्थानीय तहकझ निर्वाचनसम्म दिनरात खटिने बताए।
१५औं महाधिवेशन अन्तर्गत नयाँ केन्द्रीय कार्यसमिति चयनका लागि बिहीबार बिहान १० बजेदेखि मतदान हुनेछ। महाधिवेशनमा सहभागी ७ हजार २५५ प्रतिनिधिले कांग्रेसको आगामी नेतृत्व चयनका लागि मतदान गर्ने भएका छन्।
केन्द्रीय निर्वाचन समितिका संयोजक एवं वरिष्ठ अधिवक्ता प्रेमबहादुर खड्काले बिहीबार बिहान ७ बजेदेखि मतदान गर्ने कार्यक्रम यसअघि सार्वजनिक गरिएको भए पनि वर्षा र केही प्राविधिक कारणले तीन घण्टा ढिला गरी शुरू गर्न लागिएको जानकारी दिए ।
उनका अनुसार मतदानका लागि काठमाडौँका तीन स्थानमा सात मतदान केन्द्र तोकिएको छ। प्रतिनिधिहरूको सहजताका लागि प्रदेश र प्रतिनिधित्वको आधारमा छुट्टाछुट्टै मतदान केन्द्रको व्यवस्था गरिएको हो।
निर्वाचन समितिले राष्ट्रिय सभागृह, खुलामञ्च र प्रज्ञा भवनमा मतदान केन्द्र तोकेको छ। राष्ट्रिय सभागृहमा बागमती प्रदेशका प्रतिनिधिहरूले मतदान गर्ने व्यवस्था गरिएको छ।
त्यसैगरी खुलामञ्चमा कोशी, मधेस, कर्णाली र सुदूरपश्चिम प्रदेशका प्रतिनिधिहरूले मतदान गर्नेछन्।
भ्रातृ तथा शुभेच्छुक संस्था र जनसम्पर्क समितिबाट महाधिवेशन प्रतिनिधि बनेकाहरूका लागि पनि खुलामञ्चमै मतदान गर्ने व्यवस्था गरिएको निर्वाचन समितिले जनाएको छ।
प्रज्ञा भवनमा गण्डकी र लुम्बिनी प्रदेशका प्रतिनिधिहरूका लागि मतदान केन्द्र तोकिएको छ। सम्बन्धित प्रदेश तथा समूहका प्रतिनिधिले तोकिएको मतदान केन्द्रमा पुगेर मतदान गर्नुपर्नेछ।
मतदानका क्रममा प्रतिनिधिको परिचय तथा मतदाता नामावली रुजु गरेपछि मात्र मतदान गर्न पाउने व्यवस्था गरिएको छ।
.JPG)
.JPG)
