नेपाली कांग्रेसका सभापति पदका उम्मेदवार गगन थापाले पार्टी सबैको योगदानबाट बनेको बताएका छन्।
१५औं महाधिवेशनको बन्द सत्रमा आज बोल्दै थापाले निवर्तमान सभापति शेरबहादुर देउवाले पार्टी निर्माणमा लामो समयदेखि ठूलो योगदान गरेको उल्लेख गरे।
'यो पार्टी सबैले मिलाएर बनाएको हो। निवर्तमान सभापति शेरबहादुर देउवाले यो पार्टीमा लामो समय संघर्ष गर्नुभएको छ। पार्टी निर्माणमा उहाँको ठूलो योगदान छ। अरू नेताहरूको पनि योगदान छ,' उनले भने।
महाधिवेशनमा सबै नेता सहभागी हुन नसकेकोप्रति आफूहरूलाई खुसी नलागेको पनि थापाले बताए। 'हामीलाई मीठो लागेको छैन। यो मञ्चमा हाम्रा दाइहरू पनि हुनुपर्थ्यो भन्ने हामीलाई लाग्छ,' उनले भने।
थापाले आगामी दिनमा पनि सबैलाई जोडेर अघि बढ्ने प्रतिबद्धता जनाए। कांग्रेसको वैधानिकतासम्बन्धी विषयमा अदालतमा परेका निवेदनतर्फ संकेत गर्दै उनले अदालतबाट निर्णयको अपेक्षा गरेर बस्नु अब समयको बरबादी भएको बताए।
'हिजो पनि सर्वोच्च अदालतले नेपाली कांग्रेसको वैधानिकताका बारेमा संवैधानिक इजलासमा बहस गर्नुपर्छ भन्ने अर्को निवेदनलाई दरपीठ गरिदियो। यो अदालतले गरेको आठौँ निर्णय हो,' थापाले भने।
उनले विधानअनुसार विशेष महाधिवेशन भएको भन्दै अब पार्टीलाई एकताबद्ध बनाउने जिम्मेवारी आफूले लिने बताए। 'पार्टी मिलाउने कुरा म गर्छु। अरूले जिम्मेवारीअनुसार काम गर्नुस्,' थापाको भनाइ छ।
निवर्तमान सभापति देउवा पक्ष मंसिर २१ देखि २३ गतेसम्म १५ औं महाधिवेशन गर्ने तयारीमा छन्।
.JPG)
.JPG)
