नेकपा एमालेको स्थायी कमिटी बैठकमा यसपटक विगतका बैठकभन्दा फरक दृश्य देखिएको छ।
यसअघिका पार्टी बैठकमा अध्यक्ष केपी शर्मा ओलीको छेउमै महासचिव शंकर पोखरेल बस्ने परम्परा रहँदै आएको थियो। तर, यस पटकको बैठकमा भने पोखरेल अध्यक्ष ओलीको छेउमा छैनन्।
ओलीको एकातर्फ वरिष्ठ नेता विद्यादेवी भण्डारी र अर्कोतर्फ उपाध्यक्ष रामबहादुर थापा 'बादल' बसेका छन्। भण्डारीसँगै उपाध्यक्ष विष्णु पौडेल र त्यसपछि गोकर्ण विष्ट बसेका छन्। त्यसपछि मात्रै महासचिव पोखरेल बसेका छन्।
अर्कोतर्फ पनि उपाध्यक्षहरू र त्यसपछि अन्य नेताहरूलाई क्रमशः राखिएको थियो।
यो दृश्यले महासचिव पोखरेलसँग ओली असन्तुष्ट रहेको स्पष्ट संकेत दिएको कतिपय नेताहरू बताउँछन्।
उनी यो बैठकमा मात्रै ओलीभन्दा टाढा बसेका हुन् वा सधैं यस्तै हुनेछ, त्यो भने प्रस्ट छैन।
पार्टीमा भण्डारीको भूमिका
नेकपा एमालेले वरिष्ठ नेता भण्डारीको जिम्मेवारी र भूमिका स्पष्ट पारेको छ।
असोज ५ देखि ८ गतेसम्म बसेको एमाले केन्द्रीय कमिटीको बैठकका निर्णय सार्वजनिक गर्दै पार्टीले जारी गरेको अन्तरपार्टी निर्देशन (अपानी) मा भण्डारीको जिम्मेवारी स्पष्ट पारेको हो।
उक्त बैठकले एमाले केन्द्रीय कमिटी बैठकले भण्डारीलाई वरिष्ठ नेता चयन गरेको थियो।
अपानी अनुसार भण्डारी अध्यक्षपछिको दोस्रो वरीयतामा रहनेछिन्। उनले केन्द्रीय कमिटी, पोलिटब्युरो, स्थायी कमिटी र सचिवालयका बैठकमा सहभागी हुने व्यवस्था गरिएको छ।
त्यस्तै, भण्डारीले अध्यक्षलाई सहयोग गर्ने तथा पार्टीलाई सही र समयोचित निर्णय गर्न योगदान पुर्याउने जिम्मेवारीसमेत पाएकी छन्।
'वरिष्ठ नेताको हैसियतले पार्टीको सिद्धान्त, कार्यक्रम, नीति र प्रतिष्ठाको पक्षपोषण गर्ने,' अपानीमा भनिएको छ, 'केन्द्रीय कमिटी, पोलिटब्युरो, स्थायी कमिटी र सचिवालयले तोकेका कार्यहरू गर्ने।'
भण्डारीलाई दिइएको भूमिका सम्बन्धी निर्णय आगामी विधान महाधिवेशनमा अनुमोदनका लागि प्रस्तुत गरिने एमालेले जनाएको छ।
अपानीमा भण्डारीको नियुक्ति पार्टी विधानको धारा १०५ मा रहेको बाधा–अड्काउ फुकाउने व्यवस्था तथा धारा १३(क) मा रहेको दुई महाधिवेशनबीचको अवधिमा राष्ट्रिय महाधिवेशनप्रति उत्तरदायी भएर पार्टीको सर्वोच्च संस्थाको हैसियतमा निर्णय गर्न पाउने अधिकार प्रयोग गरेर गरिएको उल्लेख छ।
एमालेले यस निर्णयमार्फत वरिष्ठ नेता भण्डारीको पार्टीभित्रको औपचारिक भूमिका र जिम्मेवारीलाई थप स्पष्ट गरेको हो।
.JPG)
