नेपाली कांग्रेसका वरिष्ठ उपसभापति विश्वप्रकाश शर्माले महाधिवेशन प्रतिनिधिहरूलाई विशेष महाधिवेशनको पक्ष र विपक्षका आधारमा नभई पार्टीको बृहत्तर एकतालाई ध्यानमा राखेर मतदान गर्न आग्रह गरेका छन्।
काठमाडौंको पुरानो बानेश्वरमा झापा–१ को भेलालाई बिहीबार सम्बोधन गर्दै शर्माले मतपरिणाममा सबै पक्षका उम्मेदवारको सन्तुलित प्रतिनिधित्व देखिनु पार्टी एकताका लागि महत्त्वपूर्ण हुने बताए।
‘मतपरिणाम आउँदा त्यहाँ सबै थरी अनुहारको सन्तुलित प्रतिनिधित्व देखिनु पार्टीको बृहत्तर एकताको पक्षमा हुनेछ,’ उनले भने।
विशेष महाधिवेशन हुँदा विभिन्न कारणले कोही सहभागी भएको र कोही सहभागी हुन नसकेको उल्लेख गर्दै शर्माले अहिले क्रमशः पार्टीका साथीहरू जोडिँदै गएको बताए। जोडिएका साथीहरूलाई पनि मतदानको माध्यमबाट थप समेट्दै जानु सबैको कर्तव्य भएको उनको भनाइ थियो।
शर्माले आफूहरूले बनाएको वा पठाएको भन्दै केही प्यानलका नाममा चिट बाँडिएको आफूहरूले पाएको उल्लेख गर्दै त्यस्ता चिट नक्कली भएको बताए। ‘सभापतिज्यू र मेरा लागि सबै उम्मेदवार साथीहरू समान रूपले आदरणीय हुनुहुन्छ,’ उनले भने।
सभापतिको नाम जोडेर विवादमा ल्याउने प्रयास नगर्नसमेत शर्माले आग्रह गरेका छन्।
.JPG)
