भारतको दिल्लीमा मुख्य निर्वाचन आयुक्त ज्ञानेश कुमारको राजीनामा माग्दै जन्तरमन्तरमा प्रदर्शन गर्ने तयारी भइरहेका बेला प्रहरीले प्रदर्शनमा सहभागी हुन आएका युवाहरूलाई नियन्त्रणमा लिन थालेको छ।
शनिबार बिहानसम्म चर्चित युट्युबर ध्रुव राठीसहित करिब २०० जनालाई हिरासतमा लिएको भारतीय सञ्चारमाध्यमहरूले जनाएका छन्।
सिजेपीका मुख्य नेताहरू अभिजित दीप्के, सौरभ दास र आशुतोष रांकालाई पनि प्रहरीले विमानभित्रै बाट नियन्त्रणमा लिएको हिन्दुस्तान टाइम्सले लेखेको छ।
दिल्लीको व्यापारिक क्षेत्रमा प्रहरीले केही दर्जन युवालाई लखेटेर नियन्त्रणमा लिएको दृश्य टेलिभिजनमा देखिएको थियो।
प्रहरीले उनीहरूलाई गाडीमा राखेर लगेको थियो। दिल्ली प्रवेश गर्ने नाकाहरूमा बस चढेर यात्रुहरूको जाँच भइरहेको र सडकमा गाडी रोक्दै सुरक्षा जाँच गरिएको पनि भारतीय सञ्चारमाध्यमहरूले जनाएका छन्।
प्रदर्शनकारीहरूले बिहान १० बजे जन्तरमन्तरमा भेला हुने योजना बनाएका थिए। प्रहरीले भने प्रदर्शनका लागि अनुमति नदिएको जनाएको छ।
आयोजकहरूले प्रदर्शनलाई आफ्नो मौलिक अधिकार भन्दै रोकिए पनि अघि बढ्ने बताएका छन्।
दिल्लीमा ४० हजारभन्दा बढी सुरक्षाकर्मी
हिन्दुस्तान टाइम्सका अनुसार दिल्ली प्रहरी र केन्द्रीय सशस्त्र प्रहरी बलका ४० हजारभन्दा बढी सुरक्षाकर्मी परिचालन गरिएको छ।
जन्तरमन्तर पुग्ने सडकमा ब्यारिकेटहरू राखिएका छन् भने केही प्रवेश तथा निकास बिन्दुमा भेला, जुलुस र सडक अवरुद्ध गर्न निषेध गरिएको सूचना माइकबाट हिन्दी र अंग्रेजीमा सुनाइएको छ।
प्रदर्शनका कारण सार्वजनिक यातायातमा समेत असर परेको छ।
इन्डियन एक्सप्रेसका अनुसार दिल्ली मेट्रोका ४५ वटा स्टेसनका प्रवेश र निकासद्वार बन्द गरिएका छन्।
नयाँदिल्ली र हजरत निजामुद्दिन स्टेसनमा बिहान ४ बजेदेखि दिउँसो २ बजेसम्म आइपुग्ने गरी निर्धारित मेल तथा एक्सप्रेस रेल पनि रद्द गरिएको छ।
प्रदर्शनस्थलमा पहुँचसमेत सीमित गरिएको छ।
जन्तरमन्तर आसपास प्रहरीले शंकास्पद ठानेका व्यक्तिहरूलाई नियन्त्रणमा लिइरहेको छ।
आवश्यक परे हिरासतमा लिइएकाहरूलाई राख्न दिल्लीका तीनवटा खेलकुद परिसरलाई अस्थायी हिरासत केन्द्र बनाउने तयारी गरिएको एक सरकारी अधिकारीले हिन्दुस्तान टाइम्सलाई बताएका छन्।
‘प्रदर्शन गर्नु हाम्रो मौलिक अधिकार हो’
प्रदर्शनको नेतृत्व गरिरहेका सिजेपीका संस्थापक अभिजित दीप्केले दिल्ली आउनुअघि समाचार संस्था एएनआईसँग कुरा गर्दै प्रधानमन्त्री नरेन्द्र मोदी सरकारमाथि प्रश्न उठाएका थिए।
‘प्रदर्शन गर्नु हाम्रो मौलिक अधिकार हो। संविधानको धारा १९ ले लोकतान्त्रिक र शान्तिपूर्ण रूपमा प्रदर्शन गर्ने मौलिक अधिकार दिएको छ। हामी त्यही गर्न चाहन्छौं,’ दीप्केले भनेका थिए। पक्राउ परे पनि आफू पछि नहट्ने उनको भनाइ थियो।
यसअघि प्रहरीले चर्चित युट्युबर ध्रुव राठी, सिजेपीकी कानुनी मामिला प्रमुख रत्ना सिंह र विद्यार्थी नेता रौनक खत्रीलाई पनि प्रहरीले नियन्त्रणमा लिएको छ।
शनिबार विमानस्थलमा आफ्ना तीन नेता पक्राउ परेको खबर सार्वजनिक गर्दै सिजेपीले त्यसलाई ‘तानाशाहीपूर्ण’ भनेको छ र उनीहरूको तत्काल तथा बिनासर्त रिहाइ मागेको छ।
मतदाता नामावली पुनरावलोकन विवाद
सिजेपीले ज्ञानेश कुमारको राजीनामा माग्नुको मुख्य कारण निर्वाचन आयोगले अघि बढाएको मतदाता नामावलीको विशेष सघन पुनरावलोकन (एसआइआर) प्रक्रिया हो। विपक्षी दल र अभियानीहरूले यस प्रक्रियामा ठूलो संख्यामा मतदाताको नाम हटाइएको र त्यसबाट सत्तारूढ भारतीय जनता पार्टीलाई फाइदा पुग्न सक्ने आरोप लगाएका छन्।
इन्डियन एक्सप्रेस को अनुसन्धानमा निर्वाचन आयुक्त सुखबीर सिंह सन्धु र विवेक जोशीले एसआइआरसँग सम्बन्धित निर्णय तथा प्रक्रियामा १० महिनाभित्र कम्तीमा १४ पटक आपत्ति जनाएको उल्लेख थियो।
सिजेपीका संस्थापक दीप्केले सन् २०२४ यता मतदाता सूचीबाट करिब १३ करोड नाम हटाइएको दाबी गरेका छन्।
निर्वाचन आयोगले भने नाम हटाउने प्रक्रिया प्रारम्भिक पुनरावलोकनको हिस्सा भएको र गलत रूपमा हटाइएका मतदाताले पुनः नाम दर्ता गराउन सक्ने बताएको छ। आयोग र भाजपाले पक्षपातको आरोप अस्वीकार गरेका छन्।
शनिबारको प्रदर्शनलाई सिजेपीले ‘लोकतन्त्र बचाऊ’ अभियानका रूपमा अघि सारेको छ।
तर प्रदर्शनस्थल पुग्नुअघि नै नेताहरू र समर्थकहरू पक्राउ परेको खबर, ठूलो संख्यामा सुरक्षाकर्मी परिचालन र यातायातमा लगाइएका प्रतिबन्धले दिल्लीमा तनाव बढाएको छ।
.JPG)
