नेकपा एमालेका उपमहासचिव योगेश भट्टराईले पार्टी अध्यक्ष केपी शर्मा ओलीलाई ध्यानाकर्षण गराउँदै ४० वर्षमुनिका युवाहरूलाई नेतृत्वमा विशेष स्थान दिन, भूगोल र समुदायको सन्तुलन मिलाउन तथा हतारमा निर्णय गरेर पछि पछुताउनुपर्ने स्थिति नल्याउन आग्रह गरेका छन्।
शनिबार जारी स्थायी कमिटी बैठकमा विशेष काम परेकाले उपस्थित हुन नसकेपछि उपमहासचिव भट्टराईले सामाजिक सञ्जाल फेसबुकमार्फत अध्यक्ष ओलीसमक्ष आफ्ना धारणा सार्वजनिक गरेका हुन्।
मुलुकको राजनीतिक परिस्थिति गम्भीर र पेचिलो बन्दै गएको तथा लोकतन्त्र र संविधानको रक्षा राष्ट्रिय प्रश्न बनिरहेको उल्लेख गर्दै भट्टराईले भनेका छन्,'यस्तो बेलामा प्रमुख राजनीतिक दलहरूले आफूलाई रूपान्तरण सहित बलियो एकता निर्माण गरी कार्यभार पूरा गर्न अग्रसरता लिनुपर्दछ।’
जारी स्थायी कमिटी बैठकले राष्ट्रिय भेला बोलाउने तथा वडा र पालिका तहका अधिवेशन आयोजना गर्ने निर्णय गरेकोमा स्वागत गर्दै उनले सांगठनिक प्रक्रियामार्फत पार्टीलाई गतिशील बनाउन यसले मद्दत पुग्ने अपेक्षा व्यक्त गरेका छन्।
अघिल्लो केन्द्रीय कमिटी बैठकमा युवा प्रतिनिधित्व र नयाँ-पुराना नेताहरूको सन्तुलनबारे पर्याप्त कुरा उठाइए पनि निर्णयले उक्त भाव बोक्न नसक्दा सकारात्मक ऊर्जा पैदा हुन नसकेको उनको भनाइ छ।
जारी स्थायी कमिटी बैठकमा केन्द्रीय सदस्य मनोनयन, स्थायी कमिटी र पोलिटब्युरो गठनको एजेण्डा रहेकाले बाँकी केन्द्रीय सदस्य मनोनयन गर्दा ४० वर्षमुनिका युवाहरूलाई विशेष स्थान दिन र विगतमा छुटेका भूगोल, समुदाय तथा आन्तरिक सन्तुलनलाई ख्याल गर्न उनले ध्यानाकर्षण गराएका छन्।
स्थायी कमिटी र पोलिटब्युरो गठन गर्दा पुराना र नयाँको सन्तुलन मिलाउनुपर्नेमा जोड दिँदै उपमहासचिव भट्टराईले आगामी निर्वाचनसहितका चुनौती सामना गर्न पार्टीको आन्तरिक एकता पहिलो सर्त हुने स्पष्ट पारेका छन्।
पार्टी एकतालाई खण्डित गर्ने कुनै पनि निर्णय नगर्न सचेत गराउँदै उनले भनेका छन्,’पार्टी एकतालाई खण्डित गर्ने कुनै पनि निर्णय हतारमा निर्णय र फुर्सदमा पछुताउनु सरह हुनेछ। त्यो अवस्थामा केन्द्रीय कमिटीको मनोनयन, स्थायी कमिटी र पोलिटब्युरो गठनको एजेण्डा केन्द्रीय कमिटीको आगामी बैठकबाट निर्णय गर्नु उपयुक्त हुनेछ।’
.JPG)
