नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिका विभिन्न पदको मतगणना जारी छ। आजदेखि थप तीन पदको मतगणना सुरू हुने भएको छ।
केन्द्रीय निर्वाचन समितिका सदस्य सचिव राजु कटुवालका अनुसार आज बिहान ११ बजेदेखि सहमहामन्त्री (महिला), सहमहामन्त्री (खुला) र केन्द्रीय सदस्य (महिला खुला) पदको मतगणना सुरू हुनेछ।
त्यस्तै, मध्याह्न १२ बजेदेखि सहमहामन्त्री (आदिवासी जनजाति), केन्द्रीय सदस्य (आदिवासी जनजाति खुला) र केन्द्रीय सदस्य (आदिवासी जनजाति महिला) पदको मतगणना सुरू हुने निर्वाचन समितिले जनाएको छ।
उपसभापति र महामन्त्री पदको मतगणना भने जारी रहेको छ।
निर्वाचन समितिले मतगणनाका क्रममा सहमहामन्त्री पदका उम्मेदवारले दुई जना प्रतिनिधि राख्न पाउने व्यवस्था गरेको छ। तर, केन्द्रीय सदस्य पदका उम्मेदवारले भने आफू स्वयंबाहेक अन्य प्रतिनिधि राख्न पाउने छैनन्।
मतगणना कांग्रेसको केन्द्रीय कार्यालयमा भइरहेको छ। मतपरिणामबारेको जानकारी कांग्रेसले वेबसाइटबाट दिइरहेको छ।
अहिलेसम्म को को निर्वाचित?
अहिलेसम्म सभापतिमा गगन थापा निर्वाचित भएका छन्। उनले श्यामकृष्ण खड्गीलाई हराएका थिए।
वरिष्ठ उपसभापतिमा विश्वप्रकाश शर्मा र उपसभापति महिलातर्फ पुष्प भुसाल निर्विरोध चयन भएका थिए।
उपभासभापति र महामन्त्रीमा को को अघि?
उपसभापति खुलातर्फ २ र समावेशी १ गरी ३ पदका लागि चुनाव भएको थियो।
खुलातर्फ चन्द्र भण्डारी र मधु आचार्यले अग्रता लिएका छन्। समावेशीतर्फ विनोद चौधरी अघि छन्।
महामन्त्रीमा खुलातर्फ २ र महिलातर्फ १ पदका लागि निर्वाचन भएको थियो।
खुलातर्फ प्रदीप पौडेल र अमरसिंह पुन मगरले अग्रता लिएका छन्। महिलातर्फ डिला संग्रौला पन्तको अग्रता छ। मतगणना जारी छ।
