नेपाली कांग्रेसको १५औँ महाधिवेशनमा महामन्त्री पदका उम्मेदवार नैनसिंह महरले पार्टी पुनर्निर्माण र सकारात्मक परिवर्तनका लागि आफ्नो अभियान निरन्तर जारी रहने बताएका छन्।
महाधिवेशनबाट निर्वाचित सभापतिसहित सम्पूर्ण पदाधिकारीलाई बधाई दिँदै महरले सफल कार्यकालको शुभकामना व्यक्त गरेका छन्। उनले आफ्नो अभियानमा साथ, सहयोग र विश्वास गर्ने नेता, महाधिवेशन प्रतिनिधि तथा शुभेच्छुकप्रति आभार व्यक्त गरेका छन्।
महरले कांग्रेस बदल्ने आफ्नो अभियान कुनै पदमा सीमित नरहेको स्पष्ट पारेका छन्। पार्टीलाई समयअनुसार परिवर्तन गर्दै राजनीतिक संस्कार सुधार्ने र समाजमा सकारात्मक परिवर्तन ल्याउने काममा निरन्तर लागिरहने उनको भनाइ छ।
‘कांग्रेस बदल्ने हुटहुटी पदमा सीमित छैन। राजनीतिक संस्कार र समाजको सकारात्मक परिवर्तनका लागि मेरो अभियान निरन्तर जारी रहन्छ,’ महरले भनेका छन्।
उनले राजनीति परिवर्तन गर्न राजनीतिक संस्कार बदल्नुपर्ने र त्यसका लागि नेतृत्वको सोच, व्यवहार र कार्यशैलीमा सुधार आउनुपर्ने बताएका छन्। नेतृत्वमा इमानदारी, निष्ठा र विश्वास हुनुपर्ने उल्लेख गर्दै उनले विचारमा नवीनता, व्यवहारमा शालीनता र काममा परिणाम देखिनुपर्नेमा जोड दिएका छन्।
महाधिवेशनको प्रतिस्पर्धालाई लोकतान्त्रिक प्रक्रियाको एउटा चरणका रूपमा व्याख्या गर्दै महरले निर्वाचनको परिणामभन्दा विचार, मूल्य, निष्ठा र परिवर्तनप्रतिको प्रतिबद्धता महत्त्वपूर्ण हुने बताएका छन्।
उनले नेपाली कांग्रेसलाई नयाँ सोच, असल राजनीतिक संस्कार, जिम्मेवार व्यवहार र परिणाममुखी कार्यशैली भएको पार्टी बनाउन सबै मिलेर काम गर्नुपर्ने धारणा राखेका छन्। पार्टीभित्र लोकतान्त्रिक अभ्यास बलियो बनाउने, संगठन सुदृढ गर्ने र आपसी सहकार्य बढाउने काममा आफ्नो भूमिका निरन्तर रहने उनले बताएका छन्।
महरले कांग्रेसको पुनर्निर्माण, राजनीतिक संस्कारको सुधार र समाजको सकारात्मक परिवर्तनले सार्थकता नपाएसम्म आफ्नो अभियान नरोकिने उल्लेख गरेका छन्।
‘हिजो पनि परिवर्तन, आज पनि परिवर्तन र भोलि पनि सकारात्मक परिवर्तन नै मेरो राजनीतिक यात्राको मूल मर्म हो,’ उनले भने।
उनले पदलाई अवसरका रूपमा लिँदै परिवर्तनलाई जीवनभरको प्रतिबद्धताका रूपमा अघि बढाउने बताएका छन्। कांग्रेसको उज्ज्वल भविष्य निर्माण र असल राजनीतिक संस्कार विकासका लागि सबैसँग सहकार्य गर्न आफू तयार रहेको उनको भनाइ छ।
