राष्ट्रिय स्वतन्त्र पार्टी (रास्वपा) का केन्द्रीय सदस्य खगेन्द्र सुनारले नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’लाई दम भए फेरि उपनिर्वाचनमा जाने हो भनेर सोधेका छन्।
सोमबार बेलुकी तुलसीपुर उद्योग वाणिज्य संघको सभाहलमा आयोजित पार्टीको कार्यक्रमलाई सम्बोधन गर्दै बाँके क्षेत्र नम्बर ३ बाट निर्वाचित प्रतिनिधिसभा सदस्य सुनारले नेकपा संयोजक प्रचण्डलाई फेरि उपनिर्वाचन भए पनि आफूहरूले नै हराइदिने वा फेरि पनि देखाइदिने आशयका साथ बोलेका हुन्।
‘सबैभन्दा कम समय सदनमा आउने मान्छे प्रचण्ड हुन् फेरि। उनले कुनै कार्यक्रममा गएर के भनेछन् भने– उनी यत्रो ५०–६०वटा बैठक बस्दै गर्दा मुस्किलले १२–१५ वटा बैठकमा मात्रै आएका छन्,’ सुनारले भने, ‘कतै जाँदै गर्दा प्रचण्डले के भनेछन्– किन जानुहुन्न तपाईं सधैं सदनमा? भन्दा चिचिला केटाकेटीहरू बसेका छन्, त्यस्ता केटाकेटीको अगाडि म नि के बस्नु भनेर उनले बडो लाज मानेर भनेछन्।’
सुनारले थपे, ‘तपाईंलाई त्यति धेरै लाजै लाग्या हो भने उपनिर्वाचन गरौं फेरि। तर, तपाईंले भनेको जस्तै हामीलाई पनि तपाईंसँग कुम जोडेर बस्दा त्यति धेरै आनन्द भने आएको छैन है फेरि। यसो यता हेर्यो, भ्रष्टाचारी देखिन्छ। उता हेर्यो, आतंककारी देखिन्छ। उतापट्टि हेर्यो, बालुवाटार खाने देखिन्छ। उतापट्टि हेर्यो, ह्वाइटबडी खाने देखिन्छ। हामीलाई पनि खासै मज्जा आएको छैन तपाईंसँग बस्न।’
साथै, उनले आफूहरूलाई नहेप्न पनि प्रचण्डलाई चेतावनी दिए। प्रचण्डले ‘जनआन्दोलन’ गरेर सर्वसाधारणलाई गुमराहमा राखेको हुँदा अब घाइते तथा अपांगहरूका सपना आफूहरूले पूरा गर्ने दाबी उनले गरे।
सांसद सुनारले नेपाली कांग्रेसका सभापति गगन थापाको पनि चर्को आलोचना गरे।
संविधान संशोधनको विषयमा कांग्रेस सभापति गगनले रास्वपा तथा आफूहरूको खिसीटिउरी गरेको भन्दै उनले विरोध गरे।
‘नेपाली कांग्रेसका सभापति गगनकुमार थापाले कुनै मञ्चमा उभिएर बोलेको मैले सुनेको थिएँ। अहिले यस्तो अल्लारे केटाहरू बस्छन् होला, टप लगाएका केटाहरू बस्छन् होला। यो टप लगायतका केटाहरूको हातमा के हुन्छ? गफ लगाउने बाहिरूभन्दा टप लगाउने केटाहरू खतरै छन् भन्ने कुरा उनीहरूले बुझ्नुपर्छ,’ सुनारले भने, ‘म यहाँबाट गगनकुमार थापालाई, नेपाली कांग्रेसका सभापतिलाई, चुनौतीपूर्ण रूपमा भन्न चाहन्छु– हामी संविधान बुझेर आएका मानिस हौं।’
संविधानको मस्यौदा तयार हुँदादेखि लिएर संविधानसभाबाट संविधान पारित हुने बेलासम्म प्रत्येक ठाउँमा पछाडिपट्टि बसेर संसदीय भूमिकामा रिपोर्टिङ गरेर आएको पत्रकार आफू भएको सांसद सुनारले बताए।
संविधान किन चाहियो, संविधानको आधारभूत मर्म र भाव के थियो भन्नेबारे आफू टुँडिखेलमा बसेर गगन थापासँग बहस गर्न तयार रहेको उनले बताए।
‘काठमाडौंको टुँडिखेल वा तुलसीपुरको बीपी चोक, कहाँ बसेर बहस गर्ने हो गगन थापासँग?’ उनले भने।
पार्टीले सुनारसहित तीन जना सांसद नगेन्द्रकुमार गुप्ता र सुष्मा स्वर्णकार (डिम्पल) लाई आगामी चुनावबारे सर्वेक्षणका लागि दाङ जिल्लामा खटाएको छ।
आइतबार बेलुकी तुलसीपुर आइपुगेको सुनारसहितको टोलीले पहिलो दिन तुलसीपुर पश्चिमका चार पालिकामा सर्वेक्षण सकेको जनाएको छ। कार्यकर्तासँग दोहोरो संवाद र अन्तरक्रिया गरी लोकप्रिय उम्मेदवारबारे मत सर्वेक्षण गर्ने कार्यक्रम भए पनि खटिएका नेताहरूले मञ्चमार्फत भाषण मात्रै गरेका थिए।
मंगलबार घोराहीमा पनि त्यस्तै सर्वेक्षण कार्यक्रम गर्ने योजना छ। मंगलबार बिहान सांसद सुनारबाहेक अन्य सांसदहरू बंगलाचुली गाउँपालिकामा पुगेर छलफल गरेका छन्।
एक महिलामाथि अश्लील गालीगलौज गरिएको अडिओ सार्वजनिक भएपछि रास्वपाले सांसद सुनारलाई कुनै पनि सार्वजनिक कार्यक्रममा जान रोक लगाइसकेको छ।
