संसदीय सुनुवाइ समितिले जापान र मलेसियाका प्रस्तावित राजदूतहरूको सुनुवाइ होल्ड राख्ने भएको छ भने साउदी अरेबियाका लागि प्रस्तावित राजदूतको सुनुवाइ रोक्ने तयारी गरेको छ।
जापानका लागि प्रस्तावित जिज्ञानकुमार थापा र मलेसियाका लागि प्रस्तावित राजदूत चुडामणि खरेलमाथि समितिमा उजुरी परेको थियो। उनीहरूले समितिमा कार्ययोजनासमेत पेस गरिसकेका छन्।
साथै साउदी अरेबियाका लागि प्रस्तावित राजदूत गिरीबहादुर सुनारविरूद्ध पनि उजुरी परेको छ। गम्भीर आरोपसहित उजुरी परेपछि उनको सिफारिससमेत रोक्ने तयारी गरिएको छ।
समितिले उपसमिति गठन गरी यी उजुरीमाथि थप प्रमाण संकलन गर्ने तयारीसमेत गरेको छ।
जापानका प्रस्तावित राजदूतविरूद्ध यस्तो छ उजुरी
जापानका लागि प्रस्तावित जिज्ञानकुमार थापाविरूद्ध जापानको स्थायी आवासीय अनुमति रहेको भन्ने उजुरी छ। उजुरीकर्ताले राजदूत पदका लागि जारी गरेको पूर्वयोग्यतामा कुनै विदेशी मुलुकको स्थायी वा अस्थायी आवासीय अनुमति प्राप्त गरेको हुनु नहुने स्पष्ट योग्यता तोकेको उल्लेख गरेका छन्। थापाले सन् २०१८ मा जापानको एक पत्रिकालाई आफूसँग पिआर रहेको र त्यसपछि जापानमा बस्दै आएको बताएका थिए। थापाको कानागवा प्रिफेक्चरमा घर समेत रहेको उल्लेख छ।
'उहाँले स्थायी आवासीय अनुमति प्राप्त गरेको मिति, त्यसको वर्तमान अवस्था तथा उम्मेदवारी/आवेदन पेस गर्दा उक्त विवरण खुलाइएको थियो वा थिएन भन्ने विषयमा आधिकारिक कागजातसहित स्पष्ट छानबिन गरियोस्,' उजुरीकर्ताले माग गरेका छन्। उजुरीकर्ताले थापाले जापान सरकारबाट राजदूतका रूपमा स्वीकार नहुने सम्भावना समेत औँल्याएका छन्।
जापानमा घर रहेको बताएकाले थापाको घरजग्गा, व्यावसायिक संलग्नता, आर्थिक लगानी र बैंकिङ दायित्व भए नभएको पनि परीक्षण गर्न उजुरीकर्ताले माग गरेका छन्। अर्का एक उजुरीकर्ताले भने जिज्ञान थापाको नागरिकता समेत हेर्नुपर्ने भनेका छन्। साथै उनको परिवार नेपालमा बसोबास गर्छ कि गर्दैन पनि हेर्नुपर्छ भनेका छन्।
मलेसियाका प्रस्तावित राजदूतविरूद्ध यस्तो छ उजुरी
मलेसियाका लागि प्रस्तावित राजदूत चुडामणि खरेलमाथि विभिन्न आरोपसहित उजुरी परेका छन्।
मेनपावर व्यवसायी विजय मिश्रको एडभान्जर ओभरसिजबाट राजदूत भएर काम गर्छु भनेर करिब २ करोड लिएको, विजय मिश्रले उपलब्ध गराएको बा २० च ५३९ नम्बरको कालो रङको टाेएटा rav4 गाडी चढ्ने गरेको, मलेसियामा एनआरएन पूर्वअध्यक्ष दयाराम कुमालको कम्पनीको नेपाल प्रमुख एजेण्ट भइ कार्य गरेको, साथै सो कम्पनीसँग मलेसियामा कामदार लैजाने बारे सम्झौतासमेत गरेको, योगा महासंघ नेपालको महासचिव भइ कार्य गरेको संस्थाको लाखौं रुपैयाँ बेरुजु एवं घोटाला गरेको, पोखरामा सार्वजनिक वनको जग्गा मिलाइदिन्छु भनी करोडौं रुपैयाँ ठगी गरेको, तराई जनकपुर क्षेत्रमा जग्गा घोटाला काण्डमा मुछिएकोलगायत आरोप छन्।
साउदी अरेबियाका लागि प्रस्तावित राजदूतविरूद्ध यस्तो छ उजुरी
सुनुवाइ समितिमा साउदी अरेबियाका लागि प्रस्तावित राजदूत गिरीबहादुर सुनार विरूद्ध भने गम्भीर उजुरी परेको छ।
उनीविरूद्ध महिलामाथि यातना दिएको तथा हिसां गरेको उजुरी परेको हो।
उजुरीकर्ताले प्रेम सम्बन्धमा रहेर छुटेकी महिला र उनको परिवारलाई सुनारले धम्की दिएको भन्दै उजुरी दिएकी हुन्। उजुरीकर्ताले उक्त घटनामा दुई पटकसम्म सुनारले ललितपुर प्रहरी कार्यालयमा माफी मागेको पनि उजुरीम उल्लेख गरेकी छन्। साथै महिलाको परिवारलाई अन्तरंग फोटोहरू समेत पठाएको उजुरीकर्ताको दाबी छ। उजुरीकर्ताले सो घटनासँग सम्बन्धित मेसेजको स्क्रिनसट, प्रहरी कार्यालयमा माफी माग्ने र मिलापत्र हुँदाका प्रतिलिपि समेत बुझाएकी छन्।
त्यस्तै, अर्को एक उजुरीकर्ताले भने रास्वपा सांसद खगेन्द्र सुनारको हाम्रो नेपाल पार्टीमा आबद्ध भएकाले गिरीबहादुर सुनार राजदूत हुन अयोग्य रहेको उल्लेख गरेका छन्।
राजदूत नियुक्त हुने व्यक्ति कुनै दलसँग आबद्ध हुन नहुने उजुरीकर्ताको दाबी छ। उनले खगेन्द्र सुनारले दर्ता गराएको हाम्रो नेपाल पार्टीको केन्द्रीय समितिको सूची समेत बुझाएका छन्।
ती उजुरीकर्ताले राजदूतमा सिफारिस भएका सुनारभन्दा सांसद खगेन्द्र सुनारको बदख्वाँइ ज्यादा गरेका छन्। खगेन्द्र सुनारले विभिन्न व्यक्तिसँग पैसा उठाएको र त्यो पैसा व्यवस्थापनको काम गिरीबहादुरले गरेको आरोप उजुरीमा छ। त्यस्तै प्रहरीमा डिआइजी बढुवामा सांसद सुनार र प्रस्तावित राजदूत सुनारले ३३ लाख पैसा बुझेको आरोप समेत उजुरीकर्ताको छ। त्यस्तै गिरीबहादुरलाई राजदूत सिफारिस गर्न स्वामी आनन्द अरूण समेत मन्त्रालय गएको फोटो उजुरीकर्ताले पठाएका छन।
उजुरीकर्ताले सबैजसो जिल्लाबाट सूचना संकलन गरेको देखिन्छ। ती सूचना खगेन्द्र सुनार विरूद्ध संकलन गरेको भए पनि गिरीबहादुर सुनार विरूद्ध प्रयोग गर्न खोजेको देखिन्छ। उजुरीकर्ताले दलित आन्दोलनका लागि उठाइएको पैसा खगेन्द्र सुनारले दुरूपयोग गरेको र त्यसको व्यवस्थापन गिरी बहादुर सुनारले गरेको आरोप लगाएका छन्।
.JPG)
