पूर्वप्रधानमन्त्री डा. बाबुराम भट्टराईले संसदीय सुनुवाइ समितिले राजदूतमा सिफारिस भएका दुई जनाको नाम अस्वीकृत र एक जनाको नाम होल्डमा राखेर लोकतन्त्रको राम्रो अभ्यासको सन्देश दिएको बताएका छन्।
फेसबुकमा स्ट्याटस लेख्दै भट्टराईले कार्यकारीलाई स्वेच्छाचारी बन्न नदिन र संसदीय समितिहरूलाई पार्टीको लाचार छाया बन्न नदिन शक्ति सन्तुलनको सही अभ्यास आवश्यक रहेको बताएका हुन्।
'साउदी अरेबिया र मलेसियाका निम्ति प्रस्तावित राजदूतहरूलाई सर्वसम्मतिले अस्वीकृत गरेर र जापानका निम्ति प्रस्तावित व्यक्तिलाई होल्डमा राखेर संसदीय सुनुवाइ समितिले लोकतन्त्रको राम्रो अभ्यासको सन्देश दिएको छ,' उनले लेखेका छन्।
उनले आगामी दिनमा यस्तो अभ्यास अझ प्रभावकारी बन्नुपर्ने पनि बताएका छन्।
संसदीय सुनुवाइ समितिले साउदी अरेबियाका लागि प्रस्तावित राजदूत गिरीबहादुर सुनार र मलेसियाका लागि प्रस्तावित राजदूत चुडामणि खरेलको नाम सर्वसम्मतिले अस्वीकृत गरेको थियो।
सुनारको नाम महिलामाथि हिंसा र धम्की दिएको आरोपसहित उच्च नैतिक चरित्रसम्बन्धी प्रश्न उठेपछि अस्वीकृत भएको हो। खरेलको नाम भने आर्थिक अनियमितता, म्यानपावर व्यवसायीसँगको लेनदेन र स्वार्थको द्वन्द्वसम्बन्धी आरोपका कारण अस्वीकृत भएको हो।
समितिले जापानका लागि प्रस्तावित राजदूतको नाम भने होल्डमा राखेको छ।
सरकारले राजदूत पदका लागि सिफारिस गरेका नाम अस्वीकृत भएको घटना नेपालको संसदीय इतिहासमै पहिलो हो।
.JPG)
