विश्वव्यापी महामारीका रूपमा फैलिरहेको कोरोना भाइरसले बुढ्यौली लागेका र दीर्ग रोगीलाई अत्याधिक प्रभाव पारेको छ।
उक्त भाइरसको संक्रमणबाट ज्यान गुमाउनेहरूमा अधिंकाश मानिस ६० वर्ष माथिका र पहिला नै अरू रोगसँग लडिरहेकाहरू छन्।
तर दक्षिण कोरियामा भने एक जना ९६ वर्षीया हजुरआमाले कोरोना भाइरससँगको लडाइँ जितेकी छन्।
कोरियामा कोरोनाको उदगम थलो रहेको थेगु सहर नजिकै रहेको छेङ्दो काउन्टीकी ती महिलाले बुधबार कोरोना भाइरसबाट पूर्ण मुक्ति पाएकी हुन्।
उनलाई १३ मार्चमा कोरोनाको उपचारका लागि अस्पताल भर्ना गरी आइसियूमा राखेर उपचार गरिएको थियो।
कोरोना भाइरसलाई जित्ने उनी दक्षिण कोरियाकै जेष्ठ नागरिक हुन्।
अहिले उनी आफ्नै घरमा सेल्फ क्वारेन्टिनमा बसेकी छन्। उनी छोरासँग बस्दै आएकी छन्।
दक्षिण कोरियाले कोरोना भाइरसविरूद्ध अपनाएको रणनीतिलाई संसारकै उत्कृष्ट मानिएको छ। शंकास्पद सबैको परीक्षण गरेर कोरियाले संक्रमणलाई चाँडै नियन्त्रणमा ल्याएको छ।
बिहीबारसम्म त्यहाँ ९ हजार ५ सय २९ जनामा कोरोनाको संक्रमण भएको छ। तीमध्ये ४ हजार १ सय ४१ जना निको भएर घर फर्किएका छन् भने १ सय ३१ जनाको मृत्यु भएको छ।
