आज लकडाउनको तेस्रो दिन, देशैभरका सडक सुनसान छ। मानिस घरमै बसिरहेका छन्।
कोरोनाभाइरसका दुई जना विरामी टेकुस्थित अस्पतालमा उपचारत छन्। उनीहरूसँगै जहाजमा आएकाहरूको खोजी गरिँदैछ।
सरकारले लकडाउन उलंघन हुन नदिन कडाइ गरेको छ। अनावश्यक रूपमा सवारी चलाउने चालक र सवारी साधन नियन्त्रणमा लिइएका छन्।
सडकमा ट्राफिक प्रहरी, नेपाल प्रहरी, सशस्त्र प्रहरी र केही ठाउँमा नेपाली सेना पनि परिचालन गरिएका छन्।
तर अधिकांश ठाउँमा ड्युटीमा रहेका सुरक्षाकर्मीका हातमा पञ्जा र मुखमा मास्क छैन।
सुदुरपश्चिम प्रदेशको कञ्चनपुर जिल्ला कृष्णपुर नगरपालिकाभित्र पनि मास्क र पञ्जा अभाव छ। त्यहाँ विभिन्न ठाउँमा सुरक्षाका लागि खटेका सुरक्षाकर्मी आफैं जोखिममा रहेको देखेपछि स्थानीय स्वयंसेविकाले सहयोग गरेकी छिन्।
अरूलाई सुरक्षा दिने सुरक्षाकर्मी नै असुरक्षित रहेको देखेपछि व्यक्तिगत खर्चमा पञ्जा र मास्क किनेर वितरण गरेको स्वयंसेविका मीना भट्टले बताइन्।
१९ वर्षदेखि कृष्णपुर नगरपालिका वडा नम्बर ६ मा स्वयंसेविका रहेकी ४६ वर्षीया भट्टले करिब १० हजार रूपैयाँ व्यक्तिगत खर्च गरी मास्क र पञ्जा किनेर प्रहरीलाई वितरण गरेकी हुन्।
‘ड्युटीमा खटिएका प्रहरीका हातमा पञ्जा थिएन, मुखमा मास्क थिएन,’ बिहीबार सेतोपाटीसँग कुराकानी गर्दै उनले भनिन्, ‘सुरक्षाकर्मी जोखिममा भएकोले मास्क र पञ्जा वितरण गरेकी हुँ।’
भट्टले आज मात्रै गुलरिया, मोहनाचोकलगायत ठाउँमा ड्युटीमा खटिएका प्रहरीलाई एक सय थान मास्क र पञ्जा वितरण गरेको बताइन्। ‘भोलि पनि मास्क र पञ्जा बाँड्छु,’ उनले भनिन्, ‘असहाय, गरिव पनि जोखिममा छन् उनीहरूलाई पनि सामग्री दिन्छु।’
उनलाई मास्क र पञ्जा वितरण कार्यक्रममा छोरा सरोज भट्टले पनि सघाएका छन्। ‘छोरा ल्याव टेक्निसियन हो। उसँग सल्लाह गरेर हामीले मास्क र पञ्जा बाँडेका हौं,’ उनले भनिन्, ‘संभावित जोखिम कम गर्न सानो सहयोग गरेकी हुँ।’
प्रहरीहरूले पञ्जा र मास्क पाएपछि महिला स्वास्थ्य स्वयंसेविकालाई धन्यवाद दिएका थिए। ‘उहाँहरू त खुसी हुनुभयो,’ भट्टले भनिन्, ‘अहिले पैसा भए पनि मास्क र पञ्जा किन्न पाइँदैन, अभाव छ।’
भट्ट स्वयमसेविका समन्वय समितिकी अध्यक्ष पनि हुन्। उनलाई केही दिनअघि बसेको उक्त समितिको बैठक चलिरहँदा नै मास्क र पञ्जा बाँड्न सके राम्रो हुने लागेको थियो।
‘हाम्रो सानो सहयोगले पछि आइपर्ने ठूलो जोखिमबाट बच्न सकिन्छ,’ उनले भनिन्, ‘त्यही भएर मास्क र पञ्जा बाँडेकी हुँ।’ स्वयमसेवा गर्छु भन्ने भावनाकै कारण आफूलाई यस्तो काम गर्न प्रेरित गरेको उनले बताइन्।
‘आफूले सक्ने सहयोग गरेकी हुँ। महामारीका बेला केही न केही सहयोग गर्छु भन्ने लागेको थियो पूरा गरेँ,’ उनले भनिन्।
-1746009348.jpg)
