भक्तपुरस्थित खरिपाटी क्वारेन्टाइनमा रहेका ७३ जना नेपालीलाई सोमबार घर पठाइएको छ।
उनीहरूमा कोरोनाभाइरसको परीक्षणको नतिजा नेगेटिभ आएपछि घर पठाइएको नेपाली सेनाका प्रमुख सेनानी शिवप्रसाद पौडेलले जानकारी दिए।
७३ जनामध्ये २६ जना उपत्यकाभित्र र बाँकी सबै उपत्यका बाहिरका छन्। जसमा झापा, नेपालगञ्ज, पोखरा र पाँचखालसम्मका छन्।
उनीहरूलाई चार वटा बसमा सम्बन्धित जिल्ला पठाइएको छ।
उपत्यकाभित्रकालाई भने नेपाली सेनाको दुइटा बसबाट घर नजिकसम्म पुर्याइएको छ।
अब क्वारेन्टाइनमा अझै २१ जना छन्। उनीहरूको पनि कोरोना परीक्षणको नतिजा नेगेटिभ आएको छ तर क्वारेन्टाइन अवधि नपुगेकोले उनीहरूलाई भने घर नपठाइएको पौडेलले बताए।
आइतबार आएको परीक्षणको नतिजामा क्वारेन्टाइनमा रहेका ९४ जनाकै नेगेटिभ आएको थियो। यसअघि पनि चीनको वुहानबाट १ सय ७५ नेपालीलाई यहीँ क्वारेन्टाइनमा राखिएको थियो।
