भारतका रक्षा सचिव अजयकुमारलाई कोरोना भाइरसको संक्रमण पुष्टि भएको छ।
भारतीय सञ्चारमाध्यमहरूका अनुसार मंगलबार अजयकुमारलाई संक्रमण पुष्टि भएपछि रक्षा मन्त्री राजनाथ सिंहलगायत अन्य अधिकारीहरू बुधबार कार्यालयमा अनुपस्थित रहे।
‘उनको सम्पर्कमा आएकाको वृहत कन्ट्याक्ट ट्रेसिङ गरिँदैछ र साउथ ब्लकस्थित कार्यालय डिसइन्फेक्सन गर्ने काम भइरहेको छ। पछिल्ला केही दिनमा रक्षा सचिवसँग झन्डै ३० जना मानिस सम्पर्कमा आएको देखिएको छ,’ स्रोतलाई उद्धृत गर्दै टाइम्स अफ इन्डियाले लेखेको छ।
भारतीय रक्षा मन्त्रालय प्रवक्ता भारतभुषण बाबुले भने यस विषयमा प्रतिक्रिया दिन अस्वीकार गरेका छन्।
रक्षा मन्त्री सिंहको कार्यालयले उनी बुधबार मन्त्रालय नआएको जानकारी दिएको छ तर उनी घरमै क्वारेन्टिनमा पनि नबसेको बताएको छ।
अजयकुमार कोरोना संक्रमण हुने उच्च ओहोदाका पहिलो भारतीय कर्मचारी हुन्। उनलाई ज्वरो आएको छ र अरू सामान्य लक्षण पनि देखिएका छन्। संक्रमण पुष्टि भएपछि उनी घरमै क्वारेन्टिनमा बसेको हिन्दुस्तान टाइम्सले जनाएको छ।
भारतमा पछिल्लो समय कोरोनाको संक्रमण तीव्र रूपमा फैलिरहेको छ। पछिल्लो २४ घन्टामा मात्रै त्यहाँ झन्डै १० हजार संक्रमित भेटिएका छन्।
बुधबारसम्म भारतमा २ लाख १७ हजार मानिसमा कोरोना देखिएको छ भने ६ हजार ८८ जनाको मृत्यु भएको छ।
कोरोना संक्रमण रोक्न मार्च अन्तिम सातादेखि लकडाउन गरेको भारतले पछिल्लो समय लकडाउन खुकुलो बनाउँदै लगेको छ।
प्रकाशित मिति: बिहिबार, जेठ २२, २०७७, ११:४१:००
.jpg)
