पाँचखालको बहुप्रतिक्षित सुनकोशी खानेपानी आयोजनाको सोमबार चौपक्षीय सम्झौता भएको छ। पाँचखाल सहरी खानेपानी तथा सरसफाइ आयोजना सम्पन्न गर्न खानेपानी तथा ढल व्यवस्था विभाग, नगर विभाग कोष, पाँचखाल नगरपालिका र उपभोक्ता समिति बीच आयोजना व्यवस्थापन सम्झौता भएको हो।
नगरपालिकाका अनुसार सम्झौतापत्रमा खानेपानी तथा ढल व्यवस्था विभागबाट विद्यानाथ भट्टराई, नगर विभाग कोषबाट सुवासराज पन्त, नगरपालिकाबाट नगर प्रमुख महेश खरेल तथा उपभोक्ता समिति तर्फबाट अध्यक्ष कुमार लामिछानेले हस्ताक्षर गरेका हुन्। सम्झौतासँगै सोमबारबाट औपचारिक रुपमा खानेपानी योजनाको काम सुरु भएको छ। खानेपानी योजनाका लागि 'हुएसुइ कन्काइ जोइन्ट भेन्चर' लाई ठेक्का परेको छ।
त्यस्तै सोमबार नगर विभाग कोष र खानेपानी आयोजानाबीच ऋण एवं जमानत सम्झौता भएको छ। सम्झौता पत्र अनुसार खानेपानी आपूर्ति तर्फको कुल रकमको २५ प्रतिशत रकम ५ प्रतिशत ब्याजदरमा नगर विकास कोषले उपलब्ध गराउने उल्लेख छ। कोषले सम्झौताको ५ वर्ष सहुलियत दिने तथा २०८२ असारदेखि ऋणको सावाँ ब्याज बुझाउनुपर्ने छ।
सम्झौतापछि पाँचखाल नगर प्रमुख महेश खरेलले निकै मेहनत साथ सुरू भएको आयोजना खेर जान नदिने बताए।
परियोजनाको २०७६ भदौ १२ गते खानेपानी आयोजनाअन्तर्गत सहरी खानेपानी तथा सरसफाइ (क्षेत्रगत) आयोजना, नगर विकास कोष, पाँचखाल नगरपालिका र खानेपानी उपभोक्ताबीच सम्झौता गरिएको थियो।
आयोजना दुई अर्ब २१ करोडको लागतमा तीन वर्षमा निर्माण सम्पन्न गरिने लक्ष्य थियो। सम्झौताको शर्तअनुसार कुल योजनाको पाँच प्रतिशत अर्थात ११ करोड पाँच लाख उपभोक्ताले जम्मा गरेका छन्, जसअनुसार पाँचखालका प्रतिउपभोक्ता परिवारले खानेपानी परियोजनाको बैंक खातामा १८ हजार जम्मा गरेका थिए।
खानेपानीका लागि भुम्लु गाउँपालिका–१० स्थित सुनकोशी नदी किनारमा इनार तथा लिफ्टिङ प्रविधि निर्माणका लागि सडक पुर्याउन पाँचखाल नगर कार्यालयद्वारा सर्भेको काम सकेको पाँचखाल नगरपालिका प्राविधिक शाखा प्रमुख कपिलदेव भट्टले जानकारी दिए।
उपभोक्ता समितिका अनुसार आयोजनाबाट पाँचखाल नगर क्षेत्रका करिब सात हजार उपभोक्ता लाभान्वित हुनेछन्।