बुढानिलकण्ठ नगरपालिकाको वडा नम्बर १०मा पाँच जनाभन्दा बढी भेला हुन नपाइने भएको छ।
शुक्रबार नगरपालिकाको वडास्तरीय समितिले कोरोना भाइरसको संक्रमण बढेपनि सर्वसाधारण भेला हुने गरेको भन्दै यस्तो निर्णय गरेको हो।
'चिया पसलमा गएर गफ गर्ने, भेला हुनेजस्तो कार्य भएकोले पाँच जना भन्दा बढी भेला हुन नपाउने निर्णय गरेका हौं,' वडाध्यक्ष नवराज भट्टराईले सेतोपाटीसँग भने।
विशेष गरी बढी भीडभाड हुने ठाउँ कपनकाे मिलनचोक तरकारी बजार, आकाशेधारा ह्याडबल ग्राउण्ड एरिया, बालुवाखानी चोक, रुद्रमति चोक र फ्रेण्डसिप क्लब क्षेत्रलाई केन्द्रित गरी निर्णय गरेको उनले बताए।
उनका अनुसार वडा नम्बर १० मा मात्रै १४ जना संक्रमित छन्। यस निर्णयको पनि अटेर गरे लकडाउन वा सिल गर्ने समेत वडाध्यक्ष भट्टराईले जानकारी दिए।
