महानगरीय प्रहरी परिसर, ललितपुरले बिहीबार चार लाख ६५ हजार नक्कली रुपैयाँ बरामद गरेको छ।
बिहीबार दिउँसो ललितपुरको ताल्छिखेलस्थित जय माँ दुर्गा ज्वेलर्समा आएका ग्राहकले नक्कली पैसा दिएर फरार भएको परिसरका प्रहरी उपरीक्षक प्रज्जवल महर्जनले जानकारी दिए।
बिहीबार बिहान साढे १० बजे सो पसलमा दुई पुरूष ज्वेलर्समा सुन किन्ने भन्दै प्रवेश गरेका थिए। उनीहरूले पसल सञ्चालकलाई करिब पाँच लाख बराबरको सामान देखाउन भनेका थिए।
सुन हेरेको केहीबेरमै किन्न तम्सिएका उनीहरूले बिल नै नबुझी पैसा छाडेर भागिसकेका थिए।
उनीहरूले पाँच तोला सुनको तिलौरी र औंठी लिएर चार लाख ७० हजार रुपैयाँ पसलमा छाडेर गइसकेका थिए।
एसपी महर्जनका अनुसार ती पुरूष बिहान १० बजेर ५५ मिनेट जाँदा नै पैसा छाडेर भागिसकेका थिए। पछि पसलेले पैसा गन्दा उनले माथिमाथिको पैसा सक्कली र तलतिरको पैसा सबै नक्कली पाएपछि दिउँसो १२ बजे प्रहरीलाई खबर गरेका थिए। पैसाको बन्डलबाट प्रहरीले पाँच हजार मात्रै सक्कली पैसा पाएको हो।
'माथिमाथि चाहिँ हजार हजारको नोट रहेछ। अनि तल सबै नक्कली पैसा राखेर भागे,'महर्जनले भने,'साहुजीले पैसा गन्ने बेलामा नक्कली भन्ने चाल पाएपछि प्रहरीलाई खबर गरेका थिए।'
प्रहरीले उनीहरूको खोजी गरिरहेको एसपी महर्जनले बताए।
'हामीले सिसिटिभी फुटेज लगायत सबै विधी अपनाएर खोजी गरिरहेका छौं,'उनले भने,'अहिलेसम्म उनीहरू फेला परेका छैनन्।'