कुखुरा चोर्न गएको आरोपमा कुटपिट गरी दाङको देउखुरीमा एक जना किशोरको मृत्यु भएको छ।
राप्ती गाउँपालिका वडा नम्बर ३ नयाँबस्तीमा बिहीबार बेलुका ८ बजेतिर छिमेकी घरमा कुखुरा चोर्न गएको आरोपमा स्थानीय १८ वर्षीय नरेश चौधरीको कुटपिटबाट मृत्यु भएको हो।
इलाका प्रहरी कार्यालय भालुबाङका प्रमुख प्रहरी निरीक्षक भुवन भट्टले छिमेकीहरू २५ वर्षीय ओमप्रकाश घर्ती र उनका ६० वर्षीय बुवा खलबहादुर घर्तीको कुटपिटबाट चौधरीको मृत्यु भएको जानकारी दिए।
कुखुरा चोर्न गएको आरोप खेपेका चौधरीलाई छोराले हातले कुटे पनि बुवाले आफूले टेक्ने लाठीले टाउकोमा आक्रमण गरेको र त्यही चोटका कारण अत्यधिक रक्तश्राव भएर उनको मृत्यु भएको देखिन आएको प्रहरी निरीक्षक भट्टले सेतोपाटीलाई बताए।
चौधरी कुखुरा चोर्न आएपछि कुखुरा कराएछन् । त्यो सुनेर छोरा र बाबु खोरमा हेर्न गए।
‘उनीहरूले नरेशलाई घरमै गएर कुखुरा चोर्न गएको दोषारोपन गरे,’ प्रहरी निरीक्षक भट्टले भने, ‘त्यसपछि नरेश पनि घर्तीको कुखुरा फर्ममै गएपछि वादविवाद भयो र त्यही क्रममा बाबु-छोराले हात खुट्टा र लाठीले आक्रमण गर्दा उनी गम्भीर घाइते भए।’
घाइते नरेशलाई आमाले राति नै घर लगिन्। तर, घटनाबारे प्रहरीलाई खबर भएन।
उनलाई उपचार गर्न पनि कतै लगिएन।
लाठीको आक्रमणबाट टाउकोमा गहिरो चोट लागेका चौधरीको अत्यधिक रक्तश्रावका कारण मृत्यु भएको देखिन आएको प्रहरी निरीक्षक भट्टले सेतोपाटीलाई बताए।
‘बिहान ५ बजेतिर मृत्यु भइसकेपछि मात्रै प्रहरीलाई खबर आयो,’ भट्टले भने, ‘त्यसपछि बल्ल प्रहरी घटनास्थल पुगेको हो।’
घटनास्थल र चौधरीको घरमा समेत रगत देखिएको भट्टले जानकारी दिए।
चौधरीलाई कुटपिट गरी हत्या गरेको आरोपमा बाबु छोरालाई प्रहरीले नियन्त्रणमा लिइसकेको भट्टले बताए।
घटनाबारे थप अनुसन्धान जारी रहेको प्रहरीले बताएको छ।
चौधरीको शव भने पोष्टमार्टमका लागि लमही अस्पताल लगिएको छ।
-1746009348.jpg)
