सुनसरी प्रशासनले जिल्लामा वैशाख ३१ गतेसम्म लकडाउनको घोषणा गरेको छ।
कोरोना संक्रमण बढ्दै गएपछि मंगलबार प्रशासनले लकडाउनको निर्णय गरेको हो।
जिल्लास्तरीय कोभिड संकट व्यवस्थापन केन्द्रको बैठकले लकडाउन गर्ने निर्णय गरेको प्रमुख जिल्ला अधिकारी उमेश ढकालले बताए।
लकडाउनको समयमा अत्यावश्यकबाहेक हिँडडुल गर्न नपाइने, कुनै पनि सवारी साधन सञ्चालन गर्न नपाइने ढकालले बताए। लकडाउनको अवधिमा कलकारखाना, उद्योग धन्दा, होटल पसल सबै बन्द गर्ने निर्णय गरिएको छ।
खाद्यान्न, तरकारी र निर्माण सामग्रीका पसल भने बिहान १० बजेसम्म खोल्न पाइने ढकालले बताए।
प्रशासनको निर्देशनलाई उलंघन गर्ने जोकोहीलाई संक्रमण ऐन २०२० अनुसार कारबाही हुने उनले बताए।
सुनसरीमा वैशाख १७ गतेदेखि निषेधाज्ञा लगाइएको थियो। तर, संक्रमितको संख्या कम भएन।
‘बढ्दो संक्रमणदर नियन्त्रण गर्न बन्दाबन्दीको निर्णयमा पुगिएको हो,’ ढकालले सेतोपाटीसँग भने।
उनका अनुसार औषधी, खाद्यवस्तु वा सेवा खरिदबाहेक कुनै पनि व्यक्तिलाई घरबाहिर ननिस्कन भनिएको छ।
अत्यावश्यक सेवा एम्बुलेन्स, खानेपानी, इन्धन, स्वास्थ्य, खाद्यान्य, दुध, फलफूल, पशुपंक्षी, बैंक, वित्तीय संस्था, दुरसञ्चार, विद्युतलगायतका साधनलाई बाधा छैन।
सरकारी, सार्वजनिक कार्यालय, बैंक, वित्तीय संस्था खुल्नेछन्।
सीमा नाकाको आवागमनमा रोक लगाइएको छ। विवाह तथा मृत्यु संस्कारका लागि मापदण्ड तोकिएको छ। पत्रकारलाई सूचना विभागको परिचय पत्र, सम्बन्धित संस्थाको परिचयपत्र वा पत्रकार महासंघको परिचय पत्रका आधारमा हिँडडुल गर्न दिइने छ।
यसैगरी, झापामा कोरोना संक्रमण दर बढ्न थालेपछि वैशाख मसान्तसम्मका लागि जिल्ला प्रशासन कार्यालय झापाले पूर्ण निषेधाज्ञाको निर्णय गरेको छ।
जिल्ला प्रशासन कार्यालय झापाले वैशाख मसान्तसम्मकालागि पूर्ण निषेधाज्ञा गर्ने भएको प्रमुख जिल्ला अधिकारी श्रवणकुमार तिमिल्सिनाले बताए।
प्रशासन कार्यालयमा मंगलबार साँझ जिल्लास्तरीय कोभिड संकट व्यवस्थापनको बैठकले सो निर्णय गरेको तिम्सिनाले बताए।
उनले भने, ‘बुधबार राति १२ बजेदेखि वैशाख मसान्तसम्म झापामा पूर्ण निषेधाज्ञा हुनेछ। हामी अहिले पूर्ण निषेधाज्ञाको विषयलाई लिएर अन्य थप छलफलमा जुटिरहेका छौं।’
