विराटनगरमा चोरी गरेको सुन र चाँदी बेच्न भारतीय बजार जाँदै गर्दा तीन जना युवा प्रहरीको फन्दामा परेका छन्।
पटकपटक चोरी आरोपमा पक्राउ परेका विराटनगर–१२ का २१ वर्षीय राजकुमार कामत, १९ वर्षीय विवेक कामत र २२ वर्षीय श्रीकान्त दास पेसेवर चोरीमा संलग्न गिरोह रहेको प्रहरीले जनाएको छ।
उनीहरूमाथि जेठ ३ गते राती ९ः४५ बजे विराटनगर-३ पिपलचौकस्थित जयकिशोर चौधरीको घरबाट बीस तोला सुन र ३६ किलो चाँदी चोरी गरेको आरोप छ। चोरी गरेको एक हप्तापछि चाँदी बेच्न भारत लैजाने क्रममा उनीहरूलाई विराटनगर १२ कोशी प्रोजेक्टबाट पक्राउ गरिएको मोरङ प्रहरीका प्रमुख एसपी दीपक पोखरेलले जानकारी दिए।
प्रहरीले उनीहरूको साथबाट ३६ किलो चाँदी, आठ ग्राम सुन, २ हजार ५ सय भारू नगद, १ हजार ७३० नेपाली रूपैयाँ बरामद गरेको छ।
चोरी गरेको बीस तोला सुन भारतको जोगबनीमा बिक्री गरेको पक्राउ परेका उनीहरूले बयानको क्रममा प्रहरीलाई बताएका छन्। उनीहरूले जोगबनीमा उक्त सुन ७ लाख रूपैयाँमा बेचेको प्रहरीको प्रारम्भिक अनुसन्धानबाट खुलेको एसपी पोखरेलले बताए।
'घरको ढोका फोरेर भित्र प्रवेश गरेको १५ मिनेट भित्रमा चोरेर सुन र चाँदी झोलामा हालेर फरार भएको खुलेको छ,' उनले भने, 'त्यसपछि चोरी गरेको सामानसहित तीनै जना हाटखोलास्थित एक होटलमा तीन दिन बसेको खुलेको छ।’
पक्राउ परेका तीन जना चोरी भएको घरका छिमेकी हुन्। उनीहरूले पहिलादेखि घर रेकी गरेर कोही नभएको मौका छोपेर चोरी गरेको प्रहरीले जनाएको छ।
'चोरीमा पक्राउ परेका प्रतिवादीहरू अरू चोरीको घटनामा पनि संलग्न रहेको हुनसक्न भएकाले हामीले त्यस विषयमा पनि अनुसन्धान सुरू गरेका छौं,' एसपी पोखरेलले भने।
पक्राउ परेकाहरू चोरी कार्यमा यसअघि पनि सजाय भुक्तान गरी जेलबाट छुटेका थिए। विवेक कामत चोरी मुद्दामा यसअघि २०७९ साउन २२ गतेदेखि नौ महिना कैद भुक्तान गरेपछि वैशाख २८ गते छुटेका थिए। श्रीकान्त दास डाँकाचोरी मुद्दामा २०७७ पुस २९ गते बीस महिनाको सजाय भुक्तान गरेर २०७९ असोज ३ गते छुटेका थिए। कारगारबाट कैद भुक्तान गरेपछि उनीहरू पुरानै धन्दामा लागेको पाइएको छ।
प्रकाशित मिति: बिहीबार, जेठ ११, २०८०, २१:३१:००
