सल्यानमा बुहारीले सासूको हत्यापछि शव धानको भकारीमा लुकाएको तथ्य खुलेको छ।
शिद्धकुमाख गाउँपालिका–४ खार्बनकी ४९ वर्षीया गणेशी रोकाको शव असोज १७ गते घरभित्रै धान राख्ने काठको भकारीमा लुकाइछिपाइ राखेको अवस्थामा फेला परेको थियो।
असोज १५ गतेदेखि बेपत्ता भनिएकी गणेशीको हत्या उनकै कान्छी बुहारी १८ वर्षीया शर्मिला बुढाथोकीले गरेको जिल्ला प्रहरी प्रमुख डिएसपी नवीन कार्कीले सेतोपाटीलाई बताए।
सामान्य भनाभनको विषयलाई लिएर बुहारी शर्मिलाले घरमा कोही नभएको मौका छोपी सासू गणेशीको दाउराले टाउकोमा हानी लडाएपछि सलले घाँटी थिचेर हत्या गरी जोगिन धानको भकारीभित्र शव लुकाएर राखेको तथ्य खुलेको डिएसपी कार्कीले जानकारी दिए।
घटना अनुसन्धानमा संलग्न जिल्ला प्रहरी प्रवक्ता प्रहरी निरीक्षक गोपालप्रसाद श्रेष्ठका अनुसार असोज १५ गते बिहान शर्मिला र उनकी सासू गणेशीबीच धान माड्न (धान चुट्न) खेतमा गएका बखत सामान्य भनाभन भएको थियो।
सोही दिन दिउँसोमा पनि सासूबुहारी फेरि खेतमा धान माड्न गएका थिए। त्यतिखेर पनि सासूबुहारीबीच विवाद भएको थियो।
घरमा आएर पनि फेरि विवाद भयो। त्यही विवादका क्रममा शर्मिलाले बाहिर भान्सा नजिक राखेको दाउराले सासूलाई टाउकोमा प्रहार गरेकी थिइन्। उनी लडेपछि सोही दाउराले शरीरका विभिन्न भागमा आक्रमण गरेपछि गणेशी छटपटाउन थालिन्। गणेशी छटपटाइरहेको समयमा शर्मिलाले गणेशीकै टाउकोमा बाँधेको सल (कपडा) निकालेर घाँटीमा त्यसैले कसेर हत्या गरेको तथ्य खुल्न आएको प्रहरी प्रवक्ता श्रेष्ठले बताए।
गणेशीको मृत्यु भएको यकिन भएपछि शर्मिलाले घरको तल्लो तलाको धान राख्न बनाइएको काठको भकारीमा शव लुकाइछिपाइ राखेको श्रेष्ठले जानकारी दिए।
हत्या गरिएकी गणेशीका तीन छोरा र दुई बुहारीका साथै एक छोरी पनि छन्। गणेशीका श्रीमान तेजबहादुर रोका रोजगारको सिलसिलामा भारत गएका थिए। गणेशीका कान्छा छोरा अर्थात् शर्मिलाका श्रीमान २१ वर्षीय अम्मर रोका घटना भएको दिन बिहानै मामाघरमा टिम्मुर टिप्न भनेर गएका थिए।
गणेशीकी छोरी विद्यालय पढ्न गएकी थिइन्।
प्रहरीका अनुसार गत वैशाखमा वनगाड कपिन्डे नगरपालिका–९ सेराकी शर्मिला र अम्मरले प्रेम विवाह गरेका थिए।
शर्मिलाले हत्यापछि अपराध लुकाउन र प्रमाण नष्ट गर्नको लागि रगत लागेको कोठाको भुइँ तला लिपपोत गरेको प्रहरी अनुसन्धानबाट खुलेको छ।
बेलुका शर्मिलाले आफ्ना श्रीमान र नन्द आउँदा सासू बिहान मकै बारीतिर गएको र फर्किएर नआएको भनेर घटना लुकाउन खोजेकी थिइन्। गणेशी बेपत्ता रहेको खबरपछि पुगेका दाजु बलवीर बस्नेतले बहिनीकै घरभित्रको धान राख्ने काठको भकारीमा शव लुकाएर राखेको फेला पारेपछि प्रहरीलाई सूचना दिएका थिए।
खबर पाउनासाथ प्रहरी प्रवक्ता श्रेष्ठको नेतृत्वको टोली घटनास्थल पुगेर घटनाको अनुसन्धान थालेको थियो।
घटना अनुसन्धानबाट बुहारी शर्मिलाले सासू गणेशीको हत्या गरेको खुलेपछि असोज १९ गते बेलुकी ६ बजेतिर प्रहरीले शर्मिलालाई नियन्त्रणमा लिएको थियो।
जिल्ला अदालत सल्यानले आइतबार शर्मिलालाई सात दिन थुनामा राखेर घटना अनुसन्धान गर्न म्याद दिएको छ।
