तीन वर्षदेखि अवैध बाटोबाट अमेरिका पठाउने धन्दा गर्दै आएका दुई जना पक्राउ परेका छन्।
पक्राउ पर्नेमा काठमाडौं महानगरपालिका-१४ का ६४ वर्षीय शान्ति श्रेष्ठ र ३६ वर्षीय विशाल श्रेष्ठ छन्।
गत शुक्रबार पक्राउ परेका उनीहरूलाई काठमाडौं उपत्यका अपराध अनुसन्धान कार्यालयले मंगलबार सार्वजनिक गरेको थियो। प्रहरीको अनुसन्धानमा उनीहरू आमाछोरा रहेको खुलेको छ।
दुई साताअघि चन्द्रबहादुर रावलले उनीहरूविरद्ध वैदेशिक रोजगार विभागमा उजुरी दिएका थिए। रावलका अनुसार विशालले अमेरिका पठाइदिने तर त्यसका लागि ४० रूपैयाँ लाग्ने भनेका थिए।
उनले अन्य व्यक्तिहरूलाई पनि अमेरिका पठाएकोबारे बताएपछि रावलले पहिलो पटक १५ लाख रूपैयाँ बुझाएर अमेरिका जाने प्रक्रिया थाल्न भनेका थिए।
रावलले दिएको १५ लाख रूपैयाँमध्ये ५ लाख रूपैयाँ विशालले आफ्नी आमा शान्तीको बैंक खातामा हालिदिएका रहेछन्। सोही आधारमा प्रहरीले शान्तिलाई पनि पक्राउ गरेको थियो । उनलाई मंगलबार नै प्रहरीले छोडिसकेको छ।
विशालविरूद्ध जिल्ला अदालतबाट पाँच दिनको म्याद थप गरी वैदेशिक रोजगार विभागले अनुसन्धान अगाडि बढाएको छ।
अधिकृत लक्ष्मण खनालका अनुसार शान्तिको बैंक खाता विशालले नै चलाउने र खातामा पैसा आएको विषयमा शान्ति आफैंलाई थाहा नभएको बताइएको छ
'शान्तिलाई भने आफ्नो खातामा आएको रकमबारे जानकारी छैन रहेछ। उनको नामको बैंक खाता विशालले नै चलाउने गरेको भेटियो,' उनले भने, 'त्यही कारण शान्तिको खातामा आएको पैंसासहित थप २ लाख रूपैयाँ फिर्ता दिएकाले छोडिदिएका हौं।'
आफ्नो खातामा आएको पैसाबारे शान्ति बेखबर भएको अनुसन्धानमा देखिएपछि पीडितहरूकै सहमतिमा उनलाई छोडिएको अधिकृत खनालले बताए।
यद्यपि उनीहरू वैदेशिक रोजगार विभागले पटक/पटक सम्पर्क गर्न खोज्दा नआएपछि पक्राउ गर्न अनुसन्धान कार्यालयलाई पत्राचार गरिएको खनालले बताए।
विशाल भने विगत ३ वर्षअघिदेखि अवैधबाटो हुँदै अमेरिका पठाउने धन्दामा संलग्न भएको अनुसन्धानमा खुलेको छ। उनले तीन वर्षअघि दुबई गएर फर्किएपछि त्यहाँका एजेन्टसँग सहकार्य गरेर पठाउन थालेको स्वीकार गरेका छन्।
'अहिलेसम्म कति जनालाई पठाएका छन् भन्ने कुरा बताएका छैनन्,' उनले भने, 'उनी पक्राउ परेसँगै थप पीडितहरू आउँछन् कि भन्ने आश छ।'
यसअघि अवैधबाटो अमेरिका पुर्याउने केही व्यक्ति समातिएपछि उजुरी गर्नेको संख्या बढेको थियो।
