धादिङमा ट्रक दुर्घटना हुँदा घाइते भएका थप एक जनाको उपचारको क्रममा मृत्यु भएको छ।
आइतबार बिहान करिब ११ बजे निलकण्ठ नगरपालिका-५ खाल्टेमा बा.३ ख ८९४७ नम्बरको ट्रक अनियन्त्रित भई सडकबाट करिब ८० मिटर तल खसेर दुर्घटना भएको थियो।
दुर्घटनामा सोही नगरपालिका-५ पतेनी बस्ने राम रम्तेलका छोरा १० वर्षीय सन्तोष रम्तेलको घटनास्थलमै मृत्यु भएको थियो।
घाइतेमध्ये उपचारका लागि जिल्ला अस्पताल धादिङबेंशी पुर्याइएका सोही नगरपालिका-५ पतेनी बस्ने ४० वर्षीय राम (गोपे) रम्तेलको पनि मृत्यु भएको प्रहरीले जनाएको छ।
उनको उपचारको क्रममा मृत्यु भएको हो।
त्यस्तै दुर्घटनामा घाइते भएका ६ जनालाई उपचारका लागि नेपाली सेनाको हेलिकप्टरबाट काठमाडौंस्थित ट्रमा सेन्टर ल्याइएको छ।
उनीहरूको त्यहाँ उपचार जारी छ।