काभ्रेमा रूखमा बाँधेर जलाइएका पुरूषको सनाखत भएको छ।
गत शुक्रबार बिहान साढे ८ बजे पाँचखाल नगरपालिका वडा नम्बर ४ जिरोकिलोमा सडकबाट करिब ५० मिटर तल बिराजे खोल्चा वनमा पुरूष मृत फेला परेका थिए।
उनको सनाखत भएको जिल्ला प्रहरी कार्यालय काभ्रेका प्रहरी नायब उपरीक्षक (डिएसपी) राजकुमार श्रेष्ठले जानकारी दिए। मृतक दोलखा भीमेश्वर नगरपालिका वडा नम्बर २ राम्पाका ५४ विष्णुप्रसाद सुवेदी छन्।
उनी रूखमा बाँधेर आगो लगाएको अवस्थामा फेला परेका थिए। उनको मुख र छातीमा फलामको तारले रूखमा बाँधिएको थियो।
डिएसपी श्रेष्ठका अनुसार उनी वैशाख २३ गते ललितपुरको महालक्ष्मी नगरपालिका वडा नम्बर ५ स्थित टिकाथलीबाट निस्केर सम्पर्कविहीन थिए।
उनी सम्पर्कविहीन भएको भन्दै काभ्रेमा वैशाख २४ गते निवेदन परेको थियो।
मृतक सुवेदीका छोरा सुमनले मंगलबार अस्पतालमा शव सनाखत गरेका छन्।
सुवेदीको माथिल्लो भागका ३ वटा र तल्लो भागको दायाँपट्टि चार वटा र बायाँपट्टि ५ वटा दाँत नक्कली थियो।
दाँतमार्फत् छोरा सुमनले सनाखत गरेको डिएसपी श्रेष्ठले बताए।
प्रहरीले यस घटनामा थप अनुसन्धान अघि बढाएको बताएको छ। मृतकका छोरा सुमनले शव बुझेका छन्।
