सुर्खेतमा भएको बस दुर्घटनामा मृतक दुवै जनाको सनाखत भएको छ।
सुर्खेतको वीरेन्द्रनगरस्थित कपासे नजिकै भएको बस दुर्घटनामा दैलेखको डुंगेश्वर गाउँपालिका–६ का २२ वर्षीय भिमसेन राना र बर्दियाको ठाकुरबाबा नगरपालिका–३ का अन्दाजी ७० वर्षीय शेरबहादुर खड्काको मृत्यु भएको हो।
सोमबार दिउँसो साढे १ बजे दैलेखको दुल्लु नगरपालिका–११ भुकाहाँबाट सुर्खेत आउँदै गरेको कर्णाली प्रदेश ०२ ००१ ख ०८५२ नम्बरको मिनीबस सुर्खेत–दैलेख सडक खण्डको कपासे नजिकै घुम्तीमा दुर्घटनामा परेको थियो।
दुर्घटनामा दुई जनाको घटनास्थलमै मृत्यु भएको जिल्ला प्रहरी कार्यालय सुर्खेतका प्रवक्ता डिएसपी वीरेन्द्र वीर विश्वकर्माले जानकारी दिए।
उनका अनुसार दुर्घटनामा परी २१ जना घाइते भएका छन्। घाइतेमध्ये एक जना बाहेकको अवस्था सामान्य रहेको छ।
एक जनाको अवस्था मध्यम देखिएको डिएसपी विश्वकर्माले जानकारी दिए। घाइतेहरूको कर्णाली प्रदेश अस्पताल र कर्णाली केयरमा उपचार भइरहेको छ। दुर्घटनाको यकिन कारण भने खुलिसकेको छैन।
-1746009348.jpg)
