बलात्कार गरेको आरोपमा पक्राउ परेका थुनुवा पाटन अस्पतालको हिरासतबाट फरार भएका छन्।
प्रहरी वृत्त सातदोबाटोको हिरासतमा रहेका १९ वर्षीय दीपक साउद बुधबार दिउँसो साढे १२ बजे पाटन अस्पतालको शौचालयबाट फरार भएको जिल्ला प्रहरी परिसर ललितपुरका एसएसपी श्यामकृष्ण अधिकारीले जानकारी दिए।
साउदले १७ वर्षीया नाबालिकामाथि बलात्कार गरेको आरोप छ। उनी १८ दिनदेखि सातदोबाटो प्रहरी हिरासतमा बस्दै आएका थिए।
एसएसपी अधिकारीका अनुसार साउद बिरामी भएपछि पाटन अस्पतालमा उपचारका लागि लगिएको थियो।
‘ज्वरो आएपछि उपचार गराउन भनेर लगेको थियो। त्यही बेला शौच गर्नु पर्यो भनेर भनेका थिए। प्रहरीले भित्र झ्यालको अवस्था हेरेन। शौच गर्न भनेपछि हतकडी पनि खोलेको बेलामा उनी झ्यालबाट भागे,’ उनले भने, ‘अहिले खोजी भइरहेको छ।’
घटनामा प्रहरीको कमजोरीबारे पनि छानबिन भइरहेको उनले जानकारी दिए।
फरार भएका साउद १७ वर्षीया किशोरीसँग लिभिङ टुगेदरमा बसेको र त्यसैबीच बलात्कारको घटना भएको प्रहरीले जनाएको छ।
-1746009348.jpg)
