नेकपा एकीकृत समाजवादी गण्डकीका उपाध्यक्ष एवं स्याङ्जा अध्यक्ष विष्णु गिरी मुछिएको बलात्कार पीडित नाबालिगले अभिभावकसँग बस्न अस्वीकार गरेकी छन्।
उच्च अदालत पोखराका न्यायाधीशद्वय दीपेन्द्र अधिकारी र उमेश कोइरालाको आदेश अनुसार नाबालिगले आफू संस्थाकै संरक्षणमा रहन चाहेको अधिवक्ता कुञ्जनी परियार ‘प्यासी’ले बताइन्।
‘अदालतबाट नाबालिगको चाहना अनुसार अभिभावकको जिम्मा लगाउने वा संस्थाको संरक्षणमा बस्न दिने आदेश भएको थियो। नाबालिगले अदालतका रजिष्टार समक्ष संस्थामै बस्छु भनेपछि आमाबुवाको रोहबरमा कागज गराएर संस्थामै संरक्षण गरिएको छ,’ उनले भनिन्।
नाबालिगका बुवाले आफ्नो नाबालिग छोरीलाई उक्त संस्थाले बन्दी बनाएको आरोप लगाएर उच्च अदालतमा बन्दीप्रत्यक्षीकरणको मुद्दा दिएका थिए। उक्त मुद्दाको सुनुवाइ गर्दै अदालतले नाबालिगको चाहना अनुसार रिट जारी गरेको थियो।
बलात्कार आरोपी गिरीले पोखरामा आफ्नो घरमा नाबालिग राखेका थिए। नाबालिगले स्कुलमा कानुनी सचेतना कार्यक्रमपश्चात आफूलाई राखेका गिरीले बलात्कार गरेको साथीहरूमाझ जानकारी गराएकी थिइन्। त्यसपछि गिरीविरूद्ध जिल्ला प्रहरी कार्यालयमा जाहेरी दर्ता भएको थियो।
जाहेरी दर्ता भएपछि स्याङ्जाबाट गिरीलाई गत फागुन २० गते पक्राउ गरी पोखरा ल्याइएको थियो। नाबालिगका बुवाआमा पनि स्याङ्जामा गिरीकै घरमा काम गर्ने र होस्टाइल हुन सक्ने अवस्था देखिएकाले संस्थाको संरक्षणमा राखिएको अधिवक्ता कुञ्जनीले बताइन्।
‘बलात्कार मुद्दाका आरोपित व्यक्तिको घरमा काम गर्ने आमाबुवामार्फत् होस्टाइल हुने संभावना देखेर नाबालिगलाई संस्थाको संरक्षणमा राखिएको हो,’ उनले भनिन्, ‘नाबालिगले पनि अदालतसमक्ष आफू संस्थाकै संरक्षणमा बस्ने इच्छा राखिन्।’
गिरीले गत वर्ष असोजमा नाबालिगलाई बलात्कार गरेको र त्यसपछि पनि पटक पटक प्रयास गरेको उनले बताएकी थिइन्।
उक्त मुद्दामा अहिले कास्की प्रहरीले अनुसन्धान गरिरहेको छ।
यो पनि:
नाबालिग बलात्कार आरोपमा एकीकृत समाजवादी स्याङ्जा अध्यक्ष पक्राउ
-1746009348.jpg)
