घरबाटै एक समूहले उठाएर बेपत्ता पारिएकी ३ महिनाकी बालिकालाई प्रहरीले शुक्रबार बिहान फेला पारेको छ।
दैलेखको ठाटीकाँध गाउँपालिका–१ सिराडीका स्थानीय बमबहादुर बुढाकी तीन महिने छोरी श्रीया बुढासहित एक जना १८ वर्षीया किशोरीलाई नियन्त्रणमा लिइएको दैलेखका प्रहरी प्रमुख डिएसपी सुनिल दाहालले बताए।
स्थानीय चामुण्डाविन्द्रासैनी नगरपालिका–३ को लामिडाँडा जंगल क्षेत्रमा बच्चा बोकेर भाग्दै गरेकी ती किशोरीलाई नियन्त्रणमा लिइएको भए पनि थप विवरण भने प्रहरीले अनुसन्धानपछि मात्रै सार्वजनिक गर्ने बताएको छ।
बिहीबार राति ९ बजेतिर घरबाटै श्रीया हराएकी थिइन्। दैलेखका प्रहरी प्रवक्ता प्रहरी निरीक्षक लालबहादुर सुनारका अनुसार घरबाटै नाबालिका हराएको सूचनापछि प्रहरी खोजी कार्यमा लागेको थियो।
शुक्रबार बिहान मात्रै बालिकासहित एक किशोरीलाई नियन्त्रणमा लिइएको उनले बताए।
‘पक्राउपछि महिलालाई जिल्ला प्रहरी कार्यालयतर्फ ल्याउने छ,’ उनले भने, ‘बच्चाको अवस्था सामान्य रहेको भन्ने छ। थप कुरा अनुसन्धानपछि भनौंला।’
इलाका प्रहरी कार्यालय दुल्लुका प्रमुख प्रहरी निरीक्षक श्याम अर्यालले शुक्रबार बिहान ९ बजेतिर चामुण्डाविन्द्रासैनी नगरपालिका–३ को लामिडाँडा जंगल क्षेत्रमा बच्चा बोकेर हिँडिरहेको अवस्थामा १८ वर्षीया एक किशोरीलाई फेला पारी नियन्त्रणमा लिइएको सेतोपाटीलाई बताए।
बच्चा समातेर जंगलमा हिँडिरहेको अवस्थामा स्थानीयले बिहान किशोरीलाई देखेपछि प्रहरीलाई सूचना दिएका थिए। त्यसपछि प्रहरी पुगेर सकुशल बच्चाको उद्धार गरी किशोरीलाई नियन्त्रणमा लिइएको अर्यालले बताए।
अर्यालका अनुसार पक्राउ परेकी किशोरी चामुण्डाविन्द्रासैनी नगरपालिका–२ सिफलकी हुन्। रातभर जंगलको बाटो हिँड्दै उनीहरूले बच्चा लामिडाँडा जंगल क्षेत्रमा पुर्याउँदा रून थालेपछि उनीहरूले गाउँमा खानेकुरा खोज्न गएका बेला स्थानीयले देखेका थिए।
पक्राउ परेकी किशोरीको घर र अपहरण गरिएकी नाबालिकाको घर जंगलको बाटो झन्डै ३ देखि ४ घन्टाको पैदल दुरीमा पर्ने अर्यालले बताए।
‘किशोरीको विगत त्यति राम्रो छैन भन्ने कुरा सुन्नमा आएको छ,’ उनले भने, ‘कार्यालयमा ल्याइपुर्याएपछि थप सोधपुछ र अनुसन्धानपछि नाबालिका अपहरण गरी लैजान खोज्नुको कारण भन्न सहज होला।’
स्रोतका अनुसार ठाटीकाँध गाउँपालिका–१ सिराडीस्थित घरमा सुतिरहेकी श्रीया बुढालाई नाटकीय ढंगले चोरी गरी लगिएको थियो।
बमबहादुर बुढाकी छोरी श्रीया हराउनुभन्दा पहिला उनको घर पछाडिको रूखमा भण्डारण गरी राखिएको खरमा आगो लागेको थियो। त्यो देखेपछि छिमेकीले घरमा सुतिरहेका बमबहादुरलाई खबर गरेका थिए। त्यसपछि आगो निभाउन भनेर बमबहादुर र उनकी श्रीमती घरमा सुतिरहेका छोराछोरीलाई छोडेर त्यता लागेका थिए। उनीहरू आगो निभाएर फर्केर आउँदा घरमा सुतिरहेकी छोरी फेला परेकी थिइनन्। छोरी फेला नपरेपछि बमबहादुरको परिवारले ठाटीकाँध प्रहरीमा सूचना दिएका थिए।
-1746009348.jpg)
