शौक्षिक भ्रमणमा जाँदा विद्यार्थीलाई जातीय विभेदको आरोप लागेपछि पोखराको पृथ्वीनारायण क्याम्पस (पिएन) को व्यवस्थापन अनुसन्धान विभागका प्रमुख देवीलाल शर्मा बर्खास्त भएका छन्।
क्याम्पस प्रमुख प्रा.डा. हरिप्रसाद पाठकले उपप्राध्यापक शर्मालाई मंगलबार विभागीय प्रमुखबाट शर्मालाई पदमुक्त गरेको जानकारी दिए। वैशाख २६ गते शर्मा उक्त विभागको प्रमुख तोकिएका थिए।
क्याम्पसमा एमबिए तेस्रो वर्षमा अध्ययनरत एक विद्यार्थीलाई वैशाख २५ गतेदेखि २९ गतेसम्म भएको शौक्षिक भ्रमणका क्रममा शर्माले जातीय विभेद गरेको आरोप लागेको थियो। शौक्षिक भ्रमणमा गएका बेला सिन्धुलीमा बस बिग्रिएको समय उपप्राध्यापक शर्माले मादक पदार्थ सेवन गरी जातीय विभेदजन्य शब्दहरू र अश्लिल शब्द प्रयोग गरेर गालीगलौज गरेको विद्यार्थीले आरोप लगाएका छन्।
‘मादक पदार्थ सेवन गरेर मलाई सरले जातीय विभेद र अश्लिल शब्द प्रयोग गरेर गाली गर्नुभयो, जुन सुन्न सकिने खालका थिएनन्,’ ती विद्यार्थीले सेतोपाटीसँग भने।
उपप्राध्यापक शर्माले गालीगलौजका क्रममा विद्यार्थीको सर्टिफिकेट कहीँ पनि नबिक्ने र भविश्य पनि अन्धकार बनाउने धम्कीसमेत दिएको विद्यार्थीले आरोप लगाएका छन्।
क्याम्पस प्रशासनमा भएको छलफलमा उपप्राध्यापकसँगै रहेका अन्य व्यक्तिले विद्यार्थीमाथि गालीगलौज गरेको जनाए पनि शर्माले भने अस्वीकार गरेका थिए।
पृथ्वीनारायण क्याम्पसमा रहेको दलित विद्यार्थी समाजले विज्ञप्ति जारी गर्दै घटनाको छानबिन गरी दोषीलाई कारबाही गर्न माग गरेको छ।
जातीय विभेद आरोप खेपेका विद्यार्थीले मंगलबार जिल्ला प्रहरी कार्यालयमा निवेदन दिएको बताए। उपप्राध्यापक शर्माविरूद्ध जाहेरी दिने उनले जनाएका छन्।
कास्की प्रहरीका सूचना अधिकारी डिएसपी हरिबहादुर बस्नेतले जातीय विभेद भएको गुनासो लिएर मंगलबार विद्यार्थी प्रहरी कार्यालय आएको बताए। विद्यार्थीले कानुनी कारबाहीका लागि जाहेरी ल्याएपछि अनुसन्धान अघि बढ्ने उनले बताए।
उपप्राध्यापक शर्मासँग सम्पर्क गर्न खोज्दा उनको मोबाइल स्वीच अफ छ।
