काठमाडौंको तीनकुने घटनामा प्रहरीले अनुसन्धान सकेर सरकारी वकिललाई मुद्दा बुझाएको छ।
सरकारी वकिल कार्यालय काठमाडौंमा बिहीबार नै जिल्ला प्रहरी परिसर काठमाडौंले मुद्दा प्रतिवेदन बुझाएको हो।
प्रहरीले १०८ जनालाई मुद्दा चलाउनुपर्ने राय सरकारी वकिल समक्ष पेस गरेको छ।
सरकारी वकिल कार्यालय काठमाडौंका प्रवक्ता गोकुलबहादुर निरौलाका अनुसार १०८ जनाविरूद्ध मुद्दा चलाउनुपर्ने प्रहरीको राय छ।
प्रहरीले चैत १५ गते भएको घटनामा कतिपयमाथि राजद्रोह, आपराधिक उपद्रव, कर्तव्य ज्यान र ज्यानसम्बन्धी कसुरमा अनुसन्धान गरिरहेको हो। १०८ जनालाई नै प्रहरीले संगठित अपराधको कसुरमा जोडेर अनुसन्धान अघि बढाएको थियो।
नवराज सुवेदी नेतृत्वको संयुक्त जनआन्दोलन समितिले तोकेका दुर्गा प्रसाईंलाई संगठित अपराधसहित पाँच वटा कसुरमा मुद्दा चलाउनुपर्ने प्रहरीको राय छ।
प्रवक्ता निरौलाका अनुसार उनीमाथि कर्तव्य ज्यान, ज्यानमार्ने उद्योग, राजद्रोह र आपराधिक उपद्रव कसुरमा मुद्दा चलाउन राय पाएको छ।
यस्तै यस घटनामा राष्ट्रिय प्रजातन्त्र पार्टी (राप्रपा) का दुई जना नेता हाजिर जमानीमा छन्।
राप्रपाका वरिष्ठ उपाध्यक्ष रविन्द्र मिश्र र राप्रपा महामन्त्री एवं सांसद धवलशमशेर राणालाई हाजिर जमानीमा राखिएको छ।
मिश्र र धवलशमशेर राणालाई राजद्रोह र आपराधिक उपद्रवमा मुद्दा चलाउन राय दिएको हो।
यस घटनामा ९ जना फरारसमेत छन्। कतिपयको हकमा मुद्दा चलाउनुपर्ने राय आएपनि वतन नखुलेको पनि उल्लेख गरिएको निरौलाले बताए।
मुद्दा चलाउन राय आएकाहरूमध्ये चार जना भने बालबालिका छन्।
जिल्ला प्रहरी परिसर काठमाडौंको हिरासतमा अहिले ५३ जना छन्। ३७ जना भने हाजिर जमानीमा राखिएको छ।
प्रहरीले सरकारी वकिललाई मुद्दा चलाउन राय दिएपछि सरकारी वकिलले अभियोजन गरी थप निर्णय लिनेछ।
प्रहरीले दिएको रायअनुसार प्रतिवादीहरू थपघट पनि हुनसक्छ भने अनुसन्धान गर्न अपुग भएमा कतिपयका हकमा थप अनुसन्धान गर्न पनि सरकारी वकिलले प्रहरीलाई निर्देशन दिनसक्नेछ।
निरौलाका अनुसार अभियोजन गर्ने समय जेठ १४ गतेसम्म छ। यद्यपि यसको अभियोजन सकेर आइतबार नै मुद्दा दर्ता गर्ने तयारी रहेको उनले बताए।
