पोखराको बरपिपल रिसोर्टका संचालक जितु गुरुङले प्रदर्शनकारीले रिसोर्टमा आक्रमण गर्दा गेष्टहरुको भागाभाग भएको बताएका छन्।
रिसोर्टमा सबैजसो कोठामा गेष्ट बसेका बेला भदौ २४ गते साँझ प्रदर्शनकारीले रिसोर्टमा आक्रमण गर्न पुगेका थिए। आक्रमणबाट परी रिसोर्टको ३ वटा पर्यटक गाडी र ३ वटा गेष्ट कारमा आगजनी गरेको र रिसोर्टको बार, स्पा, लबी, गेष्टरुम लगायत आगजनी र तोडफोड भएको गुरुङले बताएका छन्। रिसोर्टमा आक्रमण गर्न आएको समूहले मदिरा र नगद लुटेर लगेको पनि उनले बताएका छन्।
जेनजी प्रदर्शनका क्रममा भदौ २४ गते पोखराका सरकारी, सार्वजनिक, व्यवसायिक र निजी संरचनामाथि तोडफोड र आक्रमण भएको थियो।
प्रदर्शनकारीले निजी तथा सार्वजनिक सम्पत्ति तोडफोड गर्ने क्रममा साँझपख बरपिपल रिसोर्ट पुगेर आक्रमण, तोडफोड र आगजनी गरेको गुरुङले बताएका छन्।
गुरुङले बरपिपल रिसोर्ट, होटल र फार्म हाउसमा गरी १२० जनालाई रोजगारी दिएको पनि उल्लेख गरेका छन्।
बैंकबाट ऋण लिएर बनाएको रिसोर्टमा 'माओवादी केन्द्रका अध्यक्ष प्रचण्डको लगानी रहेको' भन्दै प्रदर्शनकारीले आक्रमण गरेको पनि उनले उल्लेख गरेका छन्।
‘बरपिपल रिसोर्टमा माओवादी अध्यक्ष प्रचण्डको लागानी छ, त्यसैले जलाउनुपर्छ भनेर अफवाह फैलाएको पाइयो,’ उनले भनेका छन्, ‘यस्तो मिथ्या सूचना सर्वथा कपोलकल्पित, निराधार र नियोजित प्रपोगाण्डा हो। कसैसँग प्रमाण छ भने देखाउन खुला चुनौती दिन्छु।’
गुरुङले बरपिपल रिसोर्टमा आफ्नो पारिवारिक लगानीबाहेक अरु कसैको लगानी नभएको र आफु कुनै पनि पार्टीमा आवद्ध नभएको शुद्ध पर्यटन व्यवसायी भएको पनि बताएका छन्। जेनजी आन्दोलनका नाममा घुसपैठ गरेका आपराधिक समूहले रिसोर्टमा आगजनी गरेको भन्दै उनले आक्रमणमा परेर रिसोर्ट समस्यामा रहे पनि कर्मचारी र उनीहरुका सेवा सुविधामा कटौती नगर्ने बताएका छन्।
लमजुङको श्रीमञ्ज्याङबाट ३० बर्षअघि एक हजार रुपैया लिएर पोखरा आएको बताउँदै गुरुङले शुरुवातमा मासिक ५०० रुपैया तलबमा क्लिनिङ कर्मचारीका रुपमा काम शुरु गरेको बताएका छन्।
त्यसपछि पर्यटक गाइड हुँदै पोखरामा भाडामा घर लिएर होटल व्यवसायमा प्रवेश गरेका थिए। पोखरामा आइसल्याण्ड गेष्ट हाउस र सिल्भर वोक्स इन संचालन गर्दा कमाएको पैसा र बैंकबाट ऋण लिएर ७ बर्षअघि लेकसाइडको मणिमार्गको भिरालो जमिन किनेर रिसोर्ट बनाएको पनि उनले बताएका छन्।
बरपिपल रिसोर्ट अत्याधुनिक पूर्वाधारयुक्त संरचना भएको भन्दै उनले आफ्नो र परिवारको ड्रिम प्रोजेक्ट’ रहेको गुरुङले बताए। रिसोर्टले सरकारलाई बार्षिक २ करोड कर तिर्दै आएको पनि संचालक गुरुङले बताएका छन्। पटक पटक असफल र विदेश जाने चक्करकाबिच रिसोर्ट बनाएको उनले उल्लेख गरेका छन्।
‘म पटक पटक असफलता, ऋण, विदेश जाने चक्करमा ठक्कर, एजेन्टबाट धोका, दरबार हत्याकाण्ड, माओवादी युद्ध, जनआन्दोलन, नाकाबन्दी, भुकम्प, कोभिड जस्ता कहरमा पनि उठ्ने आँट गरेर रिसोर्ट ठड्याएको हुँ,’ उनले भनेका छन्।
जेनजी विद्रोहमा घुसपैठ गरेर सार्वजनिक, व्यवसायिक र निजी संरचनामाथि आक्रमण, तोडफोड, आगजनी र लुटपाट मच्चाउने समूहलाई कारबाही गर्न उनले माग गरेका छन्। जेन जी युवाहरुको माग अनुसार भ्रष्टाचारमुक्त, स्थित र शान्त नेपाल बनाउन आवश्यक रहेको भन्दै उनले अब कुनै पनि बहानामा आन्दोलन गर्नुपर्ने र व्यवसायी त्रसित हुन नपर्ने अवस्था सिर्जना गर्नुपर्ने उनले बताएका छन्।
-1758107792.jpg)
-1746009348.jpg)
