पोखराको गण्डकी मेडिकल कलेजका आन्दोलनरत नर्सहरूले इमर्जेन्सी र आइसियुको सेवा पनि छाडेर आन्दोलनमा होमिएका छन्।
अस्पताल प्रशासनले नर्सहरूले राखेका माग र आन्दोलनप्रति सकारात्मक नभएको भन्दै इमर्जेन्सी र आइसियुको सेवा पनि ‘पेन डाउन’ गरेको बताएका हुन्।
उनीहरूले गत सोमबार नै अस्पतालको सूचनापाटीमा सूचना टाँस गरेर आन्दोलनमा उत्रिएको घोषणा गरेका थिए।
नर्सहरूले सोमबार जारी गरेको विज्ञप्ति र अस्पताल प्रशासनलाई बुझाएको पत्रमा मंगलबारसम्म इमर्जेन्सी सेवा जारी राख्ने र बुधबारसम्म आइसियुको सेवा जारी राख्ने जनाएका थिए।
अस्पताल प्रशासनलाई दिएको अल्टिमेटमभित्र पनि मागबारे कुनै सुनुवाइ नगरेपछि आकस्मिक र आइसियु सेवामा पनि पेन डाउन गर्नुपरेको एक नर्सले बताइन्।
-1760529330.jpg)
-1760529328.jpg)
‘हामीलाई सरकारले तोके अनुसारको पारिश्रमिक चाहियो भनेर माग राख्दा अस्पताल प्रशासनले सुनुवाइ गरेन,’ उनले भनिन्, ‘हामीले दिएको अल्टिमेटममा पनि कुनै रेस्पोन्स नआएपछि आजदेखि इमर्जेन्सी र आइसियु सेवामा पनि पेन डाउन गरेका छौं।’
गण्डकी मेडिकल कलेजमा अहिले २५० जनाभन्दा बढी नर्सिङ स्टाफ कार्यरत छन्।
आन्दोलनरत नर्सहरूका अनुसार अस्पतालले बेसिक तलब १२ हजार रुपैयाँ र अन्य भत्ता लगायत सुविधा जोडेर १९ हजार ५०० रुपैयाँ तलब दिएको बताएका छन्।
अस्पतालमा कार्यरत श्रेणीविहीन स्वास्थ्यकर्मी र सर्टिफिकेट भएका नर्सको तलब पनि बराबर रहेको भन्दै सरकारले तोकेको मापदण्ड र निर्देशन अनुसार तलब सुविधा पाउनुपर्ने एक सूत्रीय माग राखेको उनले बताइन्।
अस्पताल प्रशासनसँग एक पटक वार्तामा बसे पनि नर्सहरूको आन्दोलनप्रति प्रशासन सकारात्मक नभएपछि आन्दोलनमा फर्कनुपरेको उनले बताइन्।
अस्पतालमा आउने बिरामीलाई असुविधा नहोस् भनेर लामो समयसम्म श्रम शोषण सहेर काम गरे पनि अस्पताल प्रशासनका तर्फबाट न्यायोजित व्यवहार नभएकाले आन्दोलनमा उत्रनुपरेको उनको भनाइ छ।
आन्दोलनमा उत्रिएको अस्पतालका आइसियु विभागमा कार्यरत नर्स समिता अधिकारीले अस्पताल प्रशासनले देशभरकै मेडिकल कलेजको अवस्था उस्तै रहेको भन्दै पन्छाउन खोजेको बताइन्।
देशभरका मेडिकल कलेजले सरकारले तोके अनुसार नर्सलाई सुविधा दिने तयार भए आफूहरू पनि सोही अनुसार सुविधा दिने बताएको उनले बताइन्।
अस्पताल जस्तो आकस्मिक र अत्यावश्यक सेवाको क्षेत्रमा नर्सहरू महिनौंदेखि आन्दोलनमा रहे पनि सरकारले बेवास्ता गरेको उनीहरू बताउँछन्। माग पूरा नभएसम्म आन्दोलन जारी रहने भन्दै उनीहरूले कुनै पनि बहानामा आन्दोलन नरोकिने बताएका छन्।
‘हाम्रो माग पूरा नहुँदासम्म आन्दोलन रोकिँदैन,’ नर्स समिताले भनिन्, ‘सरकारले गरेको निर्णय लामो समयसम्म लागू नहुँदा पनि हामी चुप लागेर बसेका थियौं। यस पटकको आन्दोलन भने माग पूरा नहुँदासम्म रोकिँदैन।’
सरकारले तोके अनुसार पारिश्रमिक र वृत्ति विकासको अवसर माग गर्दै पोखराकै मणिपाल शिक्षण अस्पतालका नर्सहरू आन्दोलनमा उत्रिएपछि गण्डकी मेडिकल कलेजका नर्सहरू पनि आन्दोलनमा उत्रिएका हुन्।
मणिपाल अस्पतालमा दसैं अघिदेखि नै नर्सहरू आन्दोलनमा उत्रिएका थिए। अस्पताल प्रशासनले माग सुनुवाइ नगरेपछि आन्दोलन जारी राख्नुपरेको मणिपाल अस्पतालका नर्सहरूको भनाइ छ।
गण्डकी मेडिकल कलेजका नर्सिङ इन्चार्ज अञ्जली पराजुलीले आन्दोलनरत नर्सहरू र अस्पताल प्रशासनबीच वार्ता र सहमति कायम गर्न खोजे पनि नसकेको बताइन्।
-1760529328.jpg)
-1760529328.jpg)
नर्सहरूको सरकारी पाँचौं तहको तलब सुविधा नपाउँदासम्म कुनै पनि सम्झौता नगर्ने भनेको र अस्पताल प्रशासनले उक्त माग पूरा गर्न सक्ने नदेखिएको उनले बताइन्।
अस्पतालका सूचना अधिकारी कृष्ण पौडेलले निजी मेडिकल कलेजको स्रोत साधनले नर्सहरूको माग अनुसार सरकारी पाँचौं तहको सुविधा दिन नसक्ने बताए।
श्रम ऐन अनुसार श्रमिकको न्यूनतम पारिश्रमिक १९ हजार ५०० रुपैयाँभन्दा कम हुने गरी कसैको पनि तलब नरहेको र उक्त ऐन अनुसार त्योभन्दा बढी तलब सुविधा दिएको पौडेलले दाबी गरे।
‘हामीले श्रम ऐन अनुसार पारिश्रमिक सुविधा दिएका छौं। सरकारी पाँचौं तहको सुविधा दिन अस्पतालको स्रोत साधनले भ्याउँदैन,’ उनले भने।
अस्पतालका नर्सहरू आन्दोलनमा उत्रिएपछि बिरामीलाई अन्यत्र रिफर गरेको र नयाँ बिरामी भर्ना बन्द गरेको पौडेलले बताए।
मेडिकल कलेजहरूको छाता संगठन एसोसिएसन अफ प्राइभेट एण्ड डेन्टल कलेज अफ नेपालले स्वास्थ्य मन्त्रालयलाई पत्राचार गरेर सरकारले तोके अनुसार नर्सलाई पाँचौं तहको तलब सुविधा दिन नसक्ने बताएको छ।
स्वास्थ्य मन्त्रालयका सचिवलाई सम्बोधन गरेर दिएको पत्रका संगठनका अध्यक्ष प्रा.डा. ज्ञानेन्द्रमान सिंह कार्कीले सरकारी अस्पतालमा स्वास्थ्यकर्मीलाई तलब लगायत सुविधा दिन सरकारले बजेट दिने भए पनि निजीमा त्यो सम्भव नभएको, स्वास्थ्य बीमाको रकम भुक्तानी नदिएको लगायतका कारणले नर्सलाई सरकारले तोकेबमोजिम तलब दिन नसक्ने उल्लेख गरेका छन्।
निजी क्षेत्रबाट चलेका पोखराका दुइटा ठूला अस्पतालहरू मणिपाल शिक्षण अस्पताल र गण्डकी मेडिकल कलेजका नर्सहरू आन्दोलनमा उत्रिएपछि सेवा प्रभावित भएको छ।
अस्पतालमा आकस्मिक सेवाका लागि जाने बिरामीले समेत भर्ना पाएका छैनन् भने गम्भीर रोगका बिरामीसमेत अन्यत्र रिफर हुनुपरेको बिरामी र तिनका आफन्तहरूले बताएका छन्।
-1760529329.jpg)
1635339834.jpeg)
-1756794700.JPG)
-1746009348.jpg)
