कीर्तिपुरको सुकुम्बासी होल्डिङ सेन्टरमा आश्रित २६ वर्षीया गृभानिका थापा मगरलाई अहिले बासभन्दा बढी आफ्नो जाँचको चिन्ता छ।
उनको १८ महिनाको छोरा र ५ वर्षकी छोरी छन्। श्रीमान, सासु-ससुरा र भान्जीसहित ७ जनाको परिवार सानो ठाउँमा बसिरहेका छन्। त्यसमाथि मंगलबार राति पानी परेर ओढ्ने-ओछ्याउने भिजेपछि जागै बस्नुपरेको उनी बताउँछिन्।
'बच्चाहरू छन्, अलि सजिलोसँग बस्न मिल्ने ठाउँ दिनू न भन्दा मान्नुभएन,' गृभानिकाले भनिन्।
बसाइको सकस आफ्नो ठाउँमा छँदैछ, तर कक्षा १२ को परीक्षा दिइरहेकी गृभानिकालाई यहाँ बसेर पढ्न सबभन्दा बढी गाह्रो भइरहेको छ। घर भत्काइनु र परीक्षा सुरू हुनु सँगसँगै परेकाले पढाइमा मन लगाउन नसकेको उनी बताउँछिन्।
वैशाख १४ देखि २७ गतेसम्म कक्षा १२ को परीक्षा छ। सुकुम्बासी बस्ती हटाउन सुरू भएको वैशाख १२ बाट हो। त्यसको दुई दिनअघिबाट माइकिङ थालिएको थियो।
'भत्काउनु नै थियो भने पनि हाम्रो जाँचसम्म कुरिदिएको भए हुन्थ्यो,' उनले भनिन्।
उनले पछिल्लो एक सातादेखि पढ्न पाएकी छैनन्। वैशाख १२ गते सरकारले सुकुम्बासी बस्ती हटाउने भनेपछि सामानहरू पोको पार्नमै व्यस्त हुनुपरेको थियो। त्यसयता ओत लाग्ने ठाउँ खोज्दै हिँड्नुपरेको उनको भनाइ छ।
बस्तीबाट विस्थापित हुनुपरेपछि हतार हतारमा उनले आफ्ना पूरा सामान पनि ल्याउन पाएकी छैनन्। लुगाफाटो र ओढ्ने-ओछ्याउने मात्र होइन, किताब-कापी पनि यताउता परेको उनी बताउँछिन्।
'अहिले खोज्दा किताब-कापी भेट्न सकेको छैन,' उनले भनिन्, 'कति उतै छुटे होलान्, कति हराए होलान्।'
उनले मंगलबार काठमाडौं महानगरपालिकाकी कार्यवाहक मेयर सुनीता डंगोल होल्डिङ सेन्टर निरीक्षणमा आउँदा आफ्नो पढाइको समस्या जानकारी गराएकी थिइन्।
गृभानिकाको समस्या सुनेपछि मेयर डंगोलले पढाइमा मद्दत होस् भनेर एक महिनाको मोबाइल डेटा लिइदिएकी छन्। आवतजावत र पढ्नलाई मुख्य विषयका गाइडको व्यवस्था गरिदिने प्रतिबद्धता पनि गरेको उनी बताउँछिन्।
उनी कालिमाटीमा रहेको जनप्रभात माध्यमिक विद्यालयमा पढ्छिन्। परीक्षाको सेन्टर काठमाडौं कलेजमा परेको छ।
व्यवस्थापन विषय लिएर कक्षा १२ पढिरहेकी गृभानिकाको चार्टर्ड एकाउन्टेन्ट (सिए) बन्ने सपना छ। त्यही सपनाले डोर्याएर ८/९ वर्षपछि फेरि पढाइमा होमिएको उनी बताउँछिन्।
'सानै उमेरमा प्रेम विवाह भयो। बच्चा भएपछि एसइई दिन पाएको थिइनँ,' उनले भनिन्, 'चार वर्षअघि मात्र प्राइभेटबाट एसइई पास गरेको हुँ।'
अहिलेसम्मका सबै परीक्षा पहिलो श्रेणीमा पास गरेको बताउने गृभानिकालाई यसपटक भने जाँच बिग्रेला कि भन्ने चिन्ता छ।
उनले जीवनमा आएको प्रतिकूल परिस्थितिमा आफ्नो पढाइमा सहयोग गर्न सबैसँग आग्रह गरेकी छन्।
'तपाईंहरूसँग कक्षा १२ (म्यानेजमेन्ट) को मुख्य मुख्य विषयका किताब र नोटहरू छन् भने मलाई दिएर सहयोग गर्नुहोला,' उनी भन्छिन्।
-1746009348.jpg)
