'रमाइलोको लागि प्र्यांक भिडिओ' बनाएका रूकुम पश्चिमका युवाहरू पक्राउ परेका छन्।
बाफिकोट गाउँपालिका ३ का २८ वर्षीय डिल्लीबहादुर वली र ३१ वर्षीय राजन केसीलाई प्रहरीले नियन्त्रणमा लिएको हो।
उनीहरूले रमाइलोका लागि भिडिओ बनाएर सामाजिक सञ्जालमा पोस्ट गरेका थिए।
जिल्ला प्रहरी प्रमुख डिएसपी बेदबहादुर पौडेलका अनुसार उनीहरूले प्र्यांक भिडिओ बनाउने गरेको पाइएको छ।
सोही क्रममा उनीहरूसँग कपिलवस्तुको कृष्णनगर नगरपालिका– ४ शिरसवा घर भई रूकुम पश्चिमको मुसिकोट नगरपालिका १ सल्लेमा पाउरोटी उद्योग चलाइरहेका ३१ वर्षीय रघुवीर कोरीसँग भेट हुन्छ।
वली र केसीले आफूहरूको परिचय दिएर रमाइलोको लागि प्र्यांक भिडिओ बनाउन अनुमति माग्छन्, रघुवीर राजी हुन्छन्। उनी पाउरोटी डेलिभरीसमेत गर्ने गर्छन्।
असार १० गते दिउँसो सल्ले भन्ने ठाउँमा सामान छोडेर खलंगातिर फर्किँदै गर्दा कोरीसँग वली र केसीको भेट भएको थियो। वली र केसीले भने जस्तै गरेर कोरीले अभिनय गरिदिए, भिडिओ खिचियो। त्यही भिडिओका कारण उनीहरू तीनै जना युवा हिरासतमा पुगेका छन्।
त्यो भिडिओ खिचे पनि वली र केसीले सार्वजनिक गरेका थिएनन्। भिडिओ अमेरिकामा बस्ने जीवन वलीलाई पठाइएको थियो।
भिडिओ जीवनले आफ्नो फेसबुकमा पोस्ट गरेका थिए। जीवनले सोही भिडिओ ‘फलो नेपाल टाइम्स’ नामक इन्स्टाग्राम अकाउन्टमार्फत पनि पोष्ट गरेका थिए।
भिडिओ धेरैले डाउनलोड गरेर आफ्नो सामाजिक सञ्जालहरूमा पोस्ट गरे, भाइरल भयो।
डिएसपी पौडेलका अनुसार एक दिनमै भिडिओको भ्युज १५ लाख पुगेको थियो।
पहाडी समुदायका व्यक्तिले मधेसी समुदायका युवकमाथि दुर्व्यवहार गरेको भन्दै भिडिओको आलोचना पनि भयो।
यो भिडिओ गृहमन्त्री सुधन गुरूङकहाँ पनि पुग्यो, उनले पनि हेरे। भिडिओ बनाउने र दुर्व्यवहार गर्नेहरूमाथि तत्काल पक्राउ गर्न उनले निर्देशन दिएका थिए। त्यसपछि गृहमन्त्रालयले मातहत प्रहरी कार्यालयलाई यो सूचना दिएको थियो।
‘हामीलाई त्यो भिडिओबारे थाहा नै थिएन,’ डिएसपी पौडेलले भने, ‘गृह मन्त्रालयबाट नै भिडिओ हामीलाई पठाइएको थियो र तत्काल दोषीको पहिचान गरि पक्राउ गर्न निर्देशन दिइएको थियो।’
गृहमन्त्रीले गुरूङले प्रहरी अधिकारीलाई सम्पर्क गरेर सामाजिक रुपमा तुच्छ व्यवहार गर्ने तथा दुर्व्यवहार गर्ने व्यक्तिलाई पक्राउ गर्न भनेका थिए।
जिल्ला प्रहरी प्रवक्ता प्रहरी निरीक्षक हेमन्त गिरीका अनुसार प्रहरीले सार्वजनिक भिडिओको अनुसन्धान गरी असार १२ गते दिउँसो सुरूमा वली र केसीलाई मुसिकोट नगरपालिका ३ माछिमीबाट पक्राउ गरेको थियो।
भिडिओबारे सोधपुछ गर्दा आपसी सहमतिमै रमाइलोको लागि भिडिओ बनाएको बयान उनीहरूले दिएका थिए।
सोही बयानका आधारमा सोही दिन अपराह्न पौने ५ बजेतिर कोरीलाई पनि प्रहरीले नियन्त्रणमा लिएको थियो।
तीनै जनाविरूद्ध जिल्ला प्रशासन कार्यालयबाट सात दिनको म्याद थप भई अनुसन्धान भइरहेको छ।
तीनै जनालाई प्रहरी हिरासतमा राखेर ‘सार्वजनिक शान्तिमा खलल पुर्याउन नहुने कसुर’मा मुद्दा चलाउने गरी अनुसन्धान गरेको हो।
डिएसपी पौडेलका अनुसार ‘सार्वजनिक शान्तिमा खलल पुर्याउन नहुने कसुर’ गर्नेहरू माथि एक वर्ष कैद वा १० हजार जरिवाना वा दुवै हुन सक्छ। उक्त भिडिओ जीवनको सामाजिक सञ्जालबाट हटाइएको छ।
