कैलालीमा चोरीको सरकारी गाडीको स्वरूप परिवर्तन गरी निजी नम्बर राखेर चलाएको आरोपमा एक युवा पक्राउ परेका छन्।
घोडाघोडी नगरपालिका–२ का ३१ वर्षीय अर्जुन कार्कीले चोरीको सरकारी गाडी किनेर, त्यसको स्वरूप बदल्दै आफ्नो पुरानो गाडीको नम्बर प्लेट राखेर व्यक्तिगत रूपमा प्रयोग गर्दै आएको पाइएपछि प्रहरीले उनलाई पक्राउ गरेको हो।
गत भदौ २५ गते जेनजी आन्दोलनको असहज परिस्थितिको मौका छोपी ४/५ जना युवाको समूहले धनगढी उपमहानगरपालिका–४ स्थित सुदूरपश्चिम विश्वविद्यालय, स्वास्थ्य विज्ञान संकाय, डिनको कार्यालयको बा २ झ २८५९ नम्बरको सरकारी गाडी जबरजस्ती लिएर गएका थिए। कार्कीले त्यही गाडी किनेका थिए।
गाडी किनेपछि कार्कीले त्यसलाई छिमेकी देश भारत पुर्याएर स्वरूप परिवर्तन गर्न लगाए।
उनले सरकारी गाडीको चेसिस नम्बर मेटाउन लगाई आफ्नो पुरानो २०१२ मोडलको गाडी नम्बर त्यही चेसिसमा हाल्न लगाए। कार्कीले डिनको कार्यालयको उक्त गाडीमा आफ्नो पुरानो गाडीको नम्बर प्लेट सु.प.प्र. ०१–००१ च ३६८७ राखी विगत ११ महिनादेखि व्यक्तिगत प्रयोजनका लागि चलाइरहेका थिए।
प्रहरीलाई उक्त गाडीबारे गोप्य सूचना मिलेपछि सादा पोसाकका प्रहरीले गाडी र कार्कीको पुरानो गाडीबारे लामो समय अनुसन्धान गरे। अनुसन्धानपछि प्रहरीले गत असार ८ गते कार्कीले नै सञ्चालन गर्दै आएको ‘लिगासैनी सः मिल तथा फर्निचर उद्योग’ बाट गाडी नियन्त्रणमा लियो।
गाडी नियन्त्रणमा लिएपछि नेपाल प्रहरीको केन्द्रीय विधि विज्ञान प्रयोगशाला, काठमाडौँबाट विशेषज्ञ प्राविधिकहरू कैलाली बोलाइयो। उनीहरूको जाँच र अनुसन्धानबाट सो गाडी डिनको कार्यालयबाट जबरजस्ती लगिएकै गाडी भएको पुष्टि भयो।
गाडी पुष्टि भएपछि प्रहरीले असार १८ गते कार्कीलाई नियन्त्रणमा लिएको थियो।
जिल्ला प्रहरी प्रवक्ता डिएसपी योगेन्द्र तिमिल्सिनाका अनुसार असार १९ गतेदेखि जिल्ला अदालतबाट म्याद थप गरी कार्कीविरूद्ध चोरी मुद्दामा अनुसन्धान भइरहेको छ।
डिएसपी तिमिल्सिनाका अनुसार आन्दोलनको मौका छोपी गाडी जबरजस्ती लैजाने र चोरी गर्ने व्यक्तिहरूको पनि पहिचान भइसकेको छ। उनीहरू हाल धनगढीभन्दा बाहिर रहेकाले खोजी कार्य तीव्र पारिएको छ।
सरकारी गाडी जबरजस्ती लैजाने, चोरी गर्ने र बिक्री गर्ने कार्यमा संलग्न व्यक्तिहरूको पहिचान भइसकेकाले उनीहरूलाई छिट्टै नियन्त्रणमा लिएर नाम सार्वजनिक गर्ने डिएसपी तिमिल्सिनाले बताए।
पक्राउ परेका कार्कीलाई प्रहरीले बिहीबार मात्रै सार्वजनिक गरेको हो।
घटना अनुसन्धानकै क्रममा रहेको तथा गाडी चोरी गर्ने, स्वरूप बदल्ने र बिक्री गर्नेहरूको विवरण सङ्कलन गर्न समय लागेकाले कार्कीबारे विवरण सार्वजनिक गर्न केही ढिलाइ भएको प्रहरीले जनाएको छ।
