६ रूटमा धमाधम अव्यवस्थित तार हटाउँदै सेवा प्रदायक (तस्बिरहरू)

सेतोपाटी संवाददाता

काठमाडौं, साउन २०

उपत्यकाका बजार क्षेत्रमा अव्यवस्थित रूपमा छरिएका र दुर्घटनाको जोखिम बढाएका टेलिफोन, इन्टरनेट तथा बिजुलीका तार व्यवस्थापनको कामले तीव्रता पाएको छ।

सञ्चार तथा सूचना प्रविधि मन्त्री र ऊर्जा, जलस्रोत तथा सिँचाइ मन्त्रीको संयुक्त निर्देशनपछि नेपाल दूरसञ्चार प्राधिकरणले अग्रसरता देखाउँदै ६ वटा मुख्य सडक रूटमा अव्यवस्थित र प्रयोगविहीन तार हटाउने कार्य अघि बढाएको हो।

काठमाडौंको त्रिपुरेश्वर–कालिमाटी–कलंकी सडकखण्डमा इन्टरनेट सेवाप्रदायक वर्ल्डलिंक लगायतका कम्पनीका प्राविधिक तथा कर्मचारीहरूले झुन्डिएका, चुडिएका र पुराना तार काट्दै व्यवस्थापन गरिरहेका छन्।

योजनाविहीन पूर्वाधार विस्तार, सेवा प्रदायकहरूबीच समन्वयको अभाव र पोलको सीमित क्षमताका कारण सहर कुरूप बन्दै गएपछि प्राधिकरणले निश्चित कार्ययोजना बनाएरै सफाइ अभियान थालेको हो।

यसअघि तोकिएका समयसीमामा सोचेअनुसार काम हुन नसकेपछि सञ्चारमन्त्री र ऊर्जामन्त्रीको संयुक्त बैठकले तत्काल काम सक्न कडा निर्देशन दिएका थिए। सोही निर्देशनअनुसार प्राधिकरणले साउन महिनाभित्रै तोकिएका ६ वटा रूटको तार व्यवस्थापन गरिसक्ने लक्ष्य राखेको छ।

तार व्यवस्थापन भइरहेका मुख्य रूटहरू:

त्रिपुरेश्वर–कालिमाटी–कलंकी

जडीबुटी–पेप्सीकोला

त्रिपुरेश्वर–लाजिम्पाट

सामाखुशी टाउन प्लानिङ (गोंगबु)

कीर्तिपुर क्षेत्र

पुरानो बानेश्वर–गौशाला–चाबहिल

जथाभावी झुन्डिएका तारका कारण करेन्ट लाग्ने, आगलागी हुने र सवारी दुर्घटनाको जोखिम उच्च रहँदै आएको थियो। साथै, मर्मतका क्रममा कुन कम्पनीको तार हो भन्ने नछुट्टिँदा एउटाको मर्मत गर्दा अर्काको सेवा अवरूद्ध हुने समस्यासमेत थियो।

प्राधिकरणले तारमा अनिवार्य रूपमा कम्पनीको पहिचान खुल्ने ट्याग राख्न र प्रयोगविहीन तारहरू तुरुन्त हटाउन सेवा प्रदायकहरूलाई निर्देशन दिएको छ।

साउन मसान्तसम्म तोकिएका ६ मुख्य रूटलाई 'गुजुल्टोमुक्त' बनाउने र त्यसपछि उपत्यकाका अन्य क्षेत्रमा पनि यो अभियान विस्तार गर्ने तयारी गरिएको छ।

तस्बिरहरू:

tarjaali-(18)-1785930908.jpg