वीरगञ्जस्थित नारायणी अस्पतालले उपचारका क्रममा मृत्यु भएका व्यक्तिलाई गरिएको उपचारसँग सम्बन्धित विस्तृत विवरण सहितको टाइमलाइन सार्वजनिक गरेको छ।
घटना भएको १२ दिनपछि अस्पताल प्रशासनले साउन १५ गतेको मिति राखेर विज्ञप्ति सार्वजनिक गरेको हो।
साउन ९ गते आकस्मिक (इमर्जेन्सी) कक्षमा उपचारको क्रममा वीरगञ्ज महानगरपालिका–२५ निवासी ५४ वर्षीय राजकुमार पटेलको मृत्यु भएको थियो।
आकस्मिक विभागमा ल्याइएको छोटो समयमै बिरामीको मृत्यु भएपछि आफन्त तथा स्थानीयले उपचारमा लापरबाही भएको र समयमा सही ध्यान नदिइएको आरोप लगाउँदै अस्पतालमा विरोध जनाएका थिए।
आक्रोशित आफन्तजनले प्रदर्शन गर्नुको साथै उपचारमा संलग्न डा. प्रमोद राममाथि हातपात गरेका थिए। उनीमाथि गरिएको आक्रमणको विरोधमा देशभरका चिकित्सक आन्दोलित भएका थिए। देशभरको ओपिडी र नारायणी अस्पतालको इमर्जेन्सी सेवा समेत अवरूद्ध भएको थियो।
मृत्युको घटनालाई लिएर उत्पन्न विवाद साम्य भएपछि अस्पताल प्रशासनले प्रेस विज्ञप्ति जारी गर्दै विस्तृत उपचार विवरण सार्वजनिक गरेको छ।
इमर्जेन्सीमा सिरिञ्ज उपलब्ध नरहेको भनी घटनाबारे विभिन्न अफवाह फैलिएपछि स्पष्ट पार्न र घटनाको सत्यतथ्य बाहिर ल्याउन टाइमलाइन सहितको विवरण सार्वजनिक गरिएको अस्पतालका निमित्त प्रमुख मेडिकल सुपरिन्टेन्डेन्ट डा. चितरन्जन साह बताउँछन्।
‘उपचारमा लापरबाही भए/नभएको आम सर्वसाधारणले हेरेको भरमा भन्न सक्ने विषय होइन, त्यसबारे मेडिकल काउन्सिलले छानबिन गरिरहेको छ,’ उनले भने।
अस्पताल प्रशासनले उपचारमा लापरबाही नभएको दाबी गर्दै आएको छ।
आकस्मिक विभाग प्रमुख डा. कृष्ण साह समेतको हस्ताक्षरमा निकालिएको विज्ञप्तिमा मिनेट–मिनेटको उपचार विवरण उल्लेख छ।
९ः३४ मा अस्पताल ल्याइएका पटेलको १०ः४० मा मृत्यु घोषणा
अस्पतालले सार्वजनिक गरेको विज्ञप्ति अनुसार साउन ९ गते बिहान ९ः३४ बजे छाती दुख्ने (बायाँ हाततिर सर्ने गरी), अत्यधिक पसिना आउने र सास फेर्न गाह्रो भएको लक्षण सहित राजकुमारलाई आकस्मिक कक्षमा उपचारका लागि ल्याइएको थियो।
९ः३६ बजे (आएको २ मिनेटमै) इसिजी गर्दा उनमा गम्भीर प्रकारको हृदयघात देखिएको थियो। त्यतिबेला रक्तचाप ९०/६० एमएम, मुटुको धड्कन ४८ मिनेट र अक्सिजनको मात्रा ६८ प्रतिशत मात्र रहेको अस्पतालको भनाइ छ। बिरामीले पहिलेदेखि नै टाइप–२ मधुमेहको औषधि सेवन गरिरहेका थिए।
९ः४६ बजे बिरामीलाई अक्सिजन जोड्नुका साथै हृदयघातका लागि आवश्यक आपतकालीन औषधिहरू इकोस्प्रिन ३ सय एमजी, क्लोपिड ३ सय एमजी, एटोर ८० एमजी, इन्जेक्सनहरू प्रिमाकोर्ट १ सय एमजी, पेन्टाप्राजोल ४० एमजी, एक्सजोन १ ग्राम स्ट्याट दिएर अक्सिजन समेत लगाएको अस्पतालको दाबी छ।
९ः५७ बजे बिरामीमा असामान्य शारीरिक हलचल देखिएर उनी ग्यास्पिङ (सास फेर्ने नसक्ने ) अवस्थामा पुगेका थिए। लगत्तै चिकित्सकहरूले क्यारोटिड पल्स जाँच गरी सिपिअनर तथा एमबियु मार्फत कृत्रिम सास दिन सुरू गरेका थिए।
त्यसपछि बिहान १०ः०२ बजे स्ट्यान्डर्ड प्रोटोकल अनुसार ’Intubation’ गरी Resuscitation प्रक्रिया निरन्तर राखिएको र ५ साइकल सिपिआर गर्दा पनि मुटुको चाल फर्कन नसकेको विज्ञप्तिमा उल्लेख छ।
इसिजी गर्दा मुटुमा कुनै पनि गतिविधि नदेखिएको चिकित्सकहरू बताउँछन्।
१०ः४० बजे राजकुमारको भाइटल साइन चेक गर्दा बिपी निल, पल्स बन्द, आँखाको नानी स्थिर, छातीको चाल नभएको र इसिजी गर्दा मुटुको चाल बन्द भएपछि बिरामीलाई मृत घोषणा गरिएको थियो। राजकुमारको मृत्यु गम्भीर हृदयघातका कारण मुटुको धड्कन बन्द भई अधिकांश भागमा रगत र अक्सिजन नपुगेर भएको दाबी अस्पतालको छ।
उपचार प्रक्रियामा वरिष्ठ मुटुरोग विशेषज्ञ डा. ब्रिजेश पाण्डे, आकस्मिक विभाग प्रमुख डा. कृष्ण साह, मेडिकल अफिसर डा. प्रमोद राम, रेसिडेन्ट डाक्टरहरू डा. सबिन खड्का, डा. अवस्था काफ्ले, डा. राम किशोर सिंह तथा नर्सिङ कर्मचारीहरू पूर्ण रूपमा खटिएको जनाएको छ।
बिरामीको गम्भीर अवस्था र मृत्युबारे आफन्तलाई समयमै जानकारी गराइएको समेत विज्ञप्तिमा उल्लेख छ।
