रूकुम पश्चिममा थुनुवा बोक्ने कारागार कार्यालयको गाडीले मोटरसाइकललाई ठक्कर दिँदा एक जना किशोरको मृत्यु भएको छ।
मोटरसाइकल चालक गम्भीर घाइते छन्। उनको बाँकेको नेपालगञ्जस्थित न्युरो अस्पतालमा उपचार भइरहेको छ।
दुर्घटनाका घाइतेमध्ये जिल्लाको आठबिसकोट नगरपालिका–८ स्थायी घर भई हाल मुसिकोट नगरपालिका–१ मठमा बस्दै आएका १८ वर्षीय निवास बोहराको मृत्यु भएको जिल्लाका प्रमुख डिएसपी बेदबहादुर पौडेलले सेतोपाटीलाई बताए।
निवास मोटरसाइकलको पछाडि सवार थिए।
मोटरसाइकल चालक आठबिसकोट नगरपालिका–१० का २० वर्षीय गणेश शाही गम्भीर घाइते छन्। जिल्लामा उपचारपछि उनलाई राति नै थप उपचारका लागि बाँकेको नेपालगञ्जस्थित न्युरो अस्पतालमा पुर्याई उपचार भइरहेको डिएसपी पौडेलले बताए।
गाडीका चालक मुसिकोट–२ रावतखेतका ५१ वर्षीय टेकबहादुर पुनलाई प्रहरीले हिरासतमा राखेको छ।
बिहीबार बेलुकी पौने ८ बजेतिर मुसिकोट नगरपालिका–८ ताबलेस्थित मध्यपहाडी लोकमार्गमा जिल्ला कारागार कार्यालय रूकुम पश्चिमको बा.प्र. ०३००१ च ३९५६ नम्बरको भ्यानले क.प्र. ०३–००१ प ०७६८ नम्बरको मोटरसाइकललाई ठक्कर दिएको थियो।
जतिखेर जिल्ला कारागारको गाडी रूकुम पश्चिमबाट थुनुवा बन्दीलाई साक्षी बयानका लागि रूकुम पूर्वस्थित रूकुमकोट जिल्ला अदालतमा उपस्थित गराएर रूकुम पश्चिमतर्फ फर्कंदै थियो भने मोटरसाइकल विपरीत दिशातर्फ जाँदै थियो।
प्रहरीका अनुसार मोटरसाइकल चालकको सवारी चालक अनुमति पत्र मागिएको भए पनि हालसम्म घरपरिवारका सदस्यले उपलब्ध गराउन सकेका छैनन्।
प्रहरीको दाबीअनुसार तीव्र गतिको मोटरसाइकल गलत साइडमा गई भ्यानसँग ठोक्किएको थियो। तर, त्यसबारे थप अनुसन्धान हुन बाँकी छ।
रूकुम पूर्वमा कारागार नहुँदाको अप्ठ्यारो
रूकुम पूर्वमा हालसम्म आफ्नै कारागार कार्यालय छैन।
पछिल्लो सीमाङ्कन हेरफेरका क्रममा रूकुमबाट चोइट्याएर रूकुम पूर्व जिल्ला (सबैभन्दा कान्छो जिल्ला) जन्मिएको थियो।
रूकुम पश्चिम कर्णाली प्रदेशअन्तर्गत छ भने रूकुम पूर्व लुम्बिनी प्रदेशको एक मात्र हिमाली जिल्ला हो।
डिएसपी पौडेलका अनुसार रूकुम पूर्वको आफ्नै कारागार कार्यालय नभएको हुँदा त्यस जिल्लाका सम्पूर्ण थुनुवाहरू रूकुम पश्चिम कारागारमा ल्याएर राख्ने गरिएको छ।
तर, रूकुम पूर्वमा मुद्दा चलेका सम्पूर्ण बन्दी वा थुनुवाहरूलाई बयान र बहसका लागि रूकुम पूर्व लैजानुपर्ने बाध्यता कायमै छ।
यही सिलसिलामा बिहीबार बेलुका बन्दीलाई साक्षी बयानका लागि रूकुम पूर्व जिल्ला अदालतमा पुर्याई रूकुम पश्चिम फर्किने क्रममा दुर्घटना भएको थियो।
जिल्ला प्रहरी प्रमुख डिएसपी पौडेलका अनुसार रूकुम पश्चिम कारागार र रूकुम पूर्व जिल्ला अदालतको दूरी कम्तीमा ४० किलोमिटर छ। बयानका लागि बिहानै रूकुम पश्चिमबाट रूकुम पूर्वमा थुनुवा पुर्याउनुपर्ने अप्ठ्यारो रूकुम पश्चिम प्रहरीलाई रहेको डिएसपी पौडेलले बताए।
‘एकातिर पहाडी साँघुरो बाटोका कारण यात्रा जोखिमयुक्त छ,’ उनले भने, ‘अर्कातिर इन्धन खर्च र जनशक्ति व्यवस्थापन गर्न पनि समस्या हुन्छ।’
विगतमा एउटै जिल्लालाई २०७४ अघिको सीमांकनमा क्रममा अलग गरी दुई फरक–फरक प्रदेशमा पारिएपछि खर्च व्यवस्थापन तथा म्यानपावर व्यवस्थापनमा समेत सकस हुने गरेको उनले बताए।
त्यसका साथै दुई जिल्लाका थुनुवाहरू राख्नुपर्ने भएको हुँदा रूकुम पश्चिमको २५ जनाको क्षमता रहेको कारागारमा हाल ५ गुणा बढी १३० जना बन्दीहरू कोचेर राख्नुपर्ने अप्ठ्यारो अवस्था रहेको पनि उनले बताए।
‘रूकुम पूर्वले छिटो आफ्नो कारागार कार्यालय बनाइदिए रूकुम पश्चिमलाई सजिलो हुने थियो,’ डिएसपी पौडेलले भने, ‘फरक प्रदेशका फरक जिल्लाहरूमा आन्तरिक स्रोतसाधन तथा म्यानपावर व्यवस्थापन चुनौतीजस्तै बन्दै गएको छ।’
उनले सीमाङ्कनपछि जिल्ला अलग भएको १० वर्ष बितिसक्दा पनि छुट्टै जिल्ला रूकुम पूर्वको आफ्नै जिल्ला कारागार कार्यालय बनाउन ध्यान नदिइएको बताए।
*यसअघि प्रहरीको गाडी भन्ने पर्न गएकामा सच्याइएको छ।
