स्मार्ट सेलको सम्पत्ति गैरकानुनी रूपमा लिलामी गरेको भन्दै २२ जना विरूद्ध जिल्ला अदालत काठमाडौंमा मुद्दा दायर भएको छ।
सरकारी वकिलको कार्यालय काठमाडौंले बुधबार जिल्ला अदालत काठमाडौंमा नेपाल इन्भेस्टमेन्ट मेघा बैंक (एनआइएमबी)का प्रमुख कार्यकारी अधिकृत ज्योतिप्रकाश पाण्डेसहित २२ जनाविरूद्ध मुद्दा दायर गरेको हो।
स्मार्ट सेल सञ्चालन गर्न २०७० वैशाख २ गते नेपाल दूरसञ्चार प्राधिकरणबाट आधारभूत टेलिफोन सेवाको अनुमतिपत्र लिइएको थियो। त्यसअनुसार अनुमति पत्र लिएर नवीकरण नगरेपछि २०८० वैशाख ३ गतेदेखि अनुमतिपत्र स्वत: रद्द भएको थियो।
अनुमतिपत्र रद्द भएपछि त्यसको सम्पूर्ण सम्पत्ति, दूरसञ्चार पूर्वाधार, संरचना, दूरसञ्चार प्रणाली र दूरसञ्चार सञ्जालको हक प्राधिकरणले नियन्त्रणमा लिएको थियो।
यसरी नियन्त्रणमा रहेको सम्पत्तिलाई बेइमानीपूर्वक सरकारको हक टुटाउने उद्देश्यले काम गरेको आरोप छ।
उनीहरूमाथि ठगी, संगठित अपराध र बैंक तथा वित्तीष संस्था सम्बन्धी कसुर गरेको आरोप छ।
प्रधानमन्त्री तथा मन्त्रिपरिषदको कार्यालयले गत वैशाख २१ गते पूर्वमहालेखा परीक्षक टंकमणि शर्मा दंगालको संयोजकत्वमा गठन भएको एनसेल सेयर खरिद बिक्री सम्बन्धी अध्ययन तथा छानबिन प्रतिवेदन २०८० आवश्यक अनुसन्धान गर्न भनेर केन्द्रीय अनुसन्धान ब्युरोलाई पत्राचार गरेको थियो।
त्यसैगरी नेपाल दूरसञ्चार प्राधिकरणले पनि सिआइबीलाई अनुरोध गरेको देखिएको हो।
यही अनुसन्धानकै क्रममा ललितपुरमा विभिन्न कित्ताको जग्गामा रहेको साढे ५ तले घरलाई २०६६ सालमा भाडामा दिएकी घरधनीले पनि जाहेरी दिएकी थिइन्।
आफूहरूले भाडामा दिए पनि हालसम्म ७ करोड १९ लाख घर भाडा बक्यौता नपाएको भन्दै घर धनी महिलाले जाहेरी दिएकी थिइन्।
यी हुन् मुद्दा दायर गर्दा प्रतिवादी कायम गरिएका २२ जना:
स्मार्ट टेलिकमका संचालक सर्वेश जोशी नरेन्द्र उलक, ट्रान्सगेट टेक प्रालिका संचालक पलिना श्रेष्ठ, एनआइएमबीका सिइओ ज्योतिप्रकाश पाण्डे, बैंकको कालिमाटी शाखाका प्रबन्धक भाष्कर नरसिंह जोशी र दरबारमार्गस्थित बैंकका संचालक समितिका अध्यक्ष पृथ्वीबहादुर पाँडेविरूद्ध मुद्दा दायर भएको छ।
त्यस्तै, समितिका पदाधिकारीहरू प्रजन्य राजभण्डारी, कबिकुमार टिब्रेवाला, दिपाङ्कर शाक्य उडाइ, शालिकराम बेलबासे, शोभा श्रेष्ठविरूद्ध पनि मुद्दा दायर भएको छ।
प्रोफेसनल बिजनेश नेटवर्कका संचालक खुमनाथ अधिकारी, स्पेक्ट्रलाइट र एनसेल आजियाटाका संचालक सतिशलाल आचार्य, स्क्वायर नेटवर्क प्रालिका ५० वर्षीय सचिनलाल आचार्य, श्रीधीर सरिपुक्ता हन्स विजयसुरिया, ताजिकिस्तानका नागरिक अब्दुजावझर कायुमोभ, चेन्नाईका थन्डालाम भिराभल्ली थिरूमला चारी, श्रीलंकन नागरिक अमाली नानायाकरा र भावना सिंह श्रेष्ठ आचार्यविरूद्ध मुद्दा छ।
त्यसैगरी भूपेन्द्र भण्डारी, एनेसेलका संचालकहरू डोनाल्ड जेम्स रे र नियो हुई युविरूद्ध मुद्दा दायर भएको छ।
उनीहरू पाँच जना अनुपस्थित र अन्यलाई फरार कायम गरी मुद्दा दायर गरेको हो।
प्रतिवादीहरूबाट ९६ अर्ब १२ करोड १७ लाख २० हजार ४४२ रुपैयाँ बिगो भराउन मागदाबी समेत गरेको छ।
