प्रतिनिधि सभा बैठकमा सभामुख डोलप्रसाद अर्यालले सत्तारूढ राष्ट्रिय स्वतन्त्र पार्टी (रास्वपा)का सांसद सुलभ खरेललाई बोल्दा बोल्दै रोकेका छन्।
सांसद खरेलले बैठकको आकस्मिक समयमा बोल्न सुरू गरेको केही समयमै सभामुख अर्यालले उनलाई रोकेर बस्न निर्देशन दिएका हुन्।
आकस्मिक समयमा बोल्ने समय लिएर सांसद खरेलले आफ्नो दल रास्वपा र उसले सञ्चालन गरेको क्यान्डिडेट क्लबको कुरा गरेका थिए।
'आजको दिनबाट राष्ट्रिय स्वतन्त्र पार्टीले क्यान्डिडेट क्लब भन्ने खुलाउँदै छ। देशभरिबाट, योग्य विज्ञ र ऊर्जाशील युवाहरूलाई राष्ट्रिय स्वतन्त्र पार्टीले अबको दिनमा हुँदै गरेको स्थानीय तह र प्रदेशको चुनावका लागि उम्मेदवार छनोट र मनोनयनका लागि क्यान्डिडेट क्लब खुलाउँदै छ। त्यसका लागि पार्टीलाई धन्यवाद दिन चाहन्छु,' उनले भनेका थिए।
सांसद खरेलले त्यसबारे थप चर्चा गर्न खोजेपछि सभामुख अर्यालले रोकेका थिए।
'आकस्मिक समय माग्नुभएको थियो। यो विषय कहिँ पनि आकस्मिक देखिएन त्यसकारण बसौं,' सभामुख अर्यालले सांसद खरेललाई निर्देशन दिँदै भनेका थिए।
प्रतिनिधि सभा नियमावली अनुसार आकस्मिक समयमा अघिल्लो बैठक अन्त्य भएपछि आजको बैठक सुरू नहुँदासम्भ भएका आकस्मिक घटनाबारे मात्रै बोल्न पाइन्छ।
